Діячка – Гойсакы з Высовы (3. част) – 70 процент – неділя, 20.00 год.

Медже нами часто сут люде, якы во вшыткым видят недосконаліст. Одраз зауважат в дакого, наприклад, на фестівали, же не так ся співат, же не так ся Лемкы зберали, же не така ма быти бесіда і вшытко решта.

А мы в нашым радию дієме цілком інакше: щыро підтримуєме і хвалиме вшыткых, хто хоче дашто добре посіяти на лемківскым поли. Без ріжниці, ци робит мало ци гідні. Ци працує уж долго, ци лем тепер ял ся даякой доброй справы.

До такых лемківскых патріотів належыт і Люба Малярска. Рядит бібліотеком в Монастырисках, співат в лемківскым хорі Яворина. А тіж веде гурток «Бесідуєме по лемківскы». Хоц іщы мала ґрупа діти зберат ся коло ней, жебы ся навчыти дашто лемківскє, а єднак то єст велика справа. Бо днеска – мало, а заран буде більше і більше…