Діти народностных меншын мали варштаты

В просторах Културно-освітнього дружства Карпаты у Вербасі, Сербія, одбыли ся 12-го фебруара 2022-го року першы із пятьох планованых варштатів в рамках проєкту Карпати и омладина – вєдно зме моцнєйши (Карпаты і молодеж – вєдно сьме міцнішы).

Як інформовала аґентура Рутенпрес, на варштатах врали участь діти вербаскых основных школ, котры приналежать до русиньской, мадярьской і україньской народностной меншыны, і мають волительный предмет свій материньскый язык з елементами народной културы.

За словами коордінатора і одповідной особы за проєкт Др. Деяна Загоряньского, котрый є і членом Націоналного совіту Русинів, цільом проєкту є, жебы ся презентовав язык, звычаї і култура каждой народностной меншыны через креатівну роботу.

Так само єдным із цілів є, жебы діти молодшого віку ся меджі собов спознали, жебы спознали розлічности своїх верстваків, жебы представили і научіли ся даякы шпеціфікы другых народностных меншын, едуковали ся і брали єдны другых як рівноправных без огляду на народностну і реліґійну приналежность.

Вдяка проєкту, за словами Загоряньского, вкажуть ся шпеціфікы і розділы, мултікултураліта, котра є богатством у мултікултуралнім оточіню, якым є і Вербас.

По закончіню проєкту є плановане зорґанізованя квізу, в рамках котрого діти, котры брали участь на проєкті, будуть мати вказати, як добрі спознали і знають єдны другых. Проєкт Карпати и омладина – вєдно зме моцнєйши підпорило сербске Міністерство про людьскы права, права меншын і соціалный діалоґ.

Жрідло фотоґрафії: Рутенпрес.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА