Димитрій Поп дожыв ся округлого юбілею

В суботу 16-го апріля 2016-го року дожыв ся округлого юбілею – 75-ох років жывота, знамый русиньскый славіста і културный діятель на Підкарпатю Димитрій Поп.

Народив ся Димитрій Поп 16-го апріля 1941-го року у селі Старобычово на Підкарпатьскій Руси, котра втогды належала Мадярьску. У 1958-ім році закінчів кооператівный технікум у Мукачові. Далше у роках 1963 – 1968 продовжовав штудовати чеськый язык і літературу на Філолоґічній факулті Ленінґрадьской універзіты.

У співавторстві зо своїм братом, історіком Іваном Попом, написав у 1971-ім році турістічного проводника „В горах и долинах Закарпатья“, так само у 1987-ім році проводника написав о містах Ужгород і Мукачово а у 2002-ім році зясь проводника о замках на Підкарпатю. У 2015-ім році выдав енціклопедію під назвов „Мала історична енциклопедія Подкарпатської Русі“.

До його заінтересовань належыть і кодіфікація підкарпатьской варіанты русиньского языка.  Вєдно із Михайлом Алмашійом і Димитрійом Сидором зробив у 2001-ім році русиньско-україньско-російскый словник. В тім самім році выдав і книжку під назвов „Подкарпатські русины, їх історичні былины и леґенды“.

Димитрій Поп быв роках 2000 – 2003 головов крайового Общества карпатьскых Русинів. Нагородженый быв Премійов Александра Павловіча, яку передавать Народна рада Русинів Закарпатя і Премійов Антонія Годинкы.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА