Детальний проґрам Родинного Табору в Завадці Рыманівскій!

Кєд іщы сте не рішыли, што робити разом з дітми на вакациях, то припоминаме, же в дн. 5.-12. липця Стоваришыня Карпатка орґанізує Родинний табір в лемківскым селі Завадка Рыманівска, якому лем.фм патронує (писали сме о тым гев).

Табір то тыжньова стріча діти, молодежы та дорослых, выполнена вшелеякого рода варштатами (музычныма, танцувальныма, рукодільныма, плястычныма, чачкарскыма), а вшыткы інспіруваны традицийном, народном культуром. З русиньскых пунктів проґраму орґанізаторы вычысляют м.ін. варштаты лемківскых танців і співів, звыкы, а окрем того, заграют гудакы з ансамблю Кычера.

Долов, за просьбом орґанізаторів, подаєме детальний проґрам Родинного Табору. Позерайте!

Уж неділю, 5. липця. т.р., по обіді і варштатах будуваня механічных чачок, одбуде ся офіцияльне одкрытя Родинного Табору. О ден, по сніданю, заплянувана єст стріча з конструкторами лір корбовых, пак одбудут ся варшаты звязаны з том професийом. По обіді, діти і молодіж будут занимати ся робліньом глиняных горців. По тых атракциях одбуде ся спільне співаня лемківскых пісен з ансамбльом Верховина. Віторок, 7. липця т.р., буде проходил в танцювальным стилю, тзн. медже інчыма одбудут ся варшаты лемківскых танців. Середа то продолжыня того, што было в віторок. Будут і танці і вшелеякы варштаты. В четвер, окрем лемківскых танців, по обіді, будут співаны лемківскы пісні, колысанкы, забавлянкы. Од 17.оо год. буде проходил выклад про бесідуваны і писаны молитвословы, в опертю о переказы з Лемковины і Підкарпатя. Пятниця, 10. липця то звиджаня рыманівской церкви і лемківской хыжы. Пак, одбуде ся выклад про лемківскы колысанкы і співанкы. Під вечер зачне ся гулянка. В остатній ден тырваня табору, т.є. в суботу по сніданю, одбудут ся варштаты робліня кривульок, тканя ходників, інструментальний ярмак, выступ театру та під вечер гулянка. Родинний Табір закінчыт ся вечерьом в реставрациі.

Веце інформаций на залученым долов афішы.

Долов знимкы з минулого рока.