Десята Інновиця

В реґіоні середньой Лемковины доста знаным селом є Новиця. Так ся діє за справом туристів, якы охочо там приходят, але самособом завдякы діяльности деякых орґанізаций і другых акций. Єдном з атракций села, яка вписала ся уж постійно в найновшу історию Новиці, сут Театральны Стрічы Innowica. Тогорічна 10. едиция пройде в днях 15.-17. червця/юнія.

Театральны Стрічы в Новици то подія направлена предовшыткым на любителів альтернативных театральных інспіраций, котра што рік через три дни запрашат до інтересуючого і наштоден нестрічаного світа. Візия модерного театру, яку пропонує Інновиця, то предовшыткым пєсы, варштаты і концерты, котры, інакше як в примірі традицийного театру, не сут выставляны на театральных сценах, а головно в новичаньскій школі, пленері ци просто в поєдных лемківскых хыжах.

Перший фестівальовий ден зачне ся неофіцийні в середу, 14. червця/юнія т.р., од театральных варштатів. Другого дня, в четвер (15.06), будут продолжаны варштаты, а окрем того в Новици выставлят ся дві першы пєсы. Од пятниці (16.06) стрічы наберут розмаху, зато же уж од самого рана будут проходити поєдны атракциі. Спочатку буде мож позерати на театр Галіґанда зо Словациі, а пізнійше взяти участ в театральных або танцювальных варштатах. В рамках подіі, окрем стисло театральных акцентів, одбуде ся выстава малярскых робіт і концерт знаной капелі Бродів. Послідній ден 10. едициі Інновиці зачне ся од варштатів про наймолодшых, дальше пройдут промоция книжкы та пєсы.

Вчас фестівалю орґанізаторы просят одвиджати адрес Новиця 8, де буде проходил рукодільний кєрмеш, та осередок Сарепта, де самособом вчас театральных подій будут дальшы выставкы. Єдном з атракций буде майстерня родины Михняків, котры продолжают поколіньову професию струганя деревяных лжыц (Новиця 14). Будучы в тій части села, вартат зазрити тіж до грекокатолицкой церкви св. Параскєвы, яка в тых днях буде специяльно одкрыта про приіздных.