Депутаты ПСК розділили свої дотації. До реґіонів піде 1,86 міліона евр

Депутаты Пряшівского самосправного краю (ПСК) схвалили на своїм засіданю 9-го мая 2022-го року розділіня своїх дотацій. Цілково розділили 1,86 евр у штирьох підпроґрамах – шпорт, култура, соціалны службы і родинна самосправа, інформовала Леа Геілова з Одділіня комунікації і пропаґації ПСК.

„І вдяка депутатьскым дотаціям можеме сістематічно розвивати нашы реґіоны, што ня барз тішыть, бо іде о адресну поміч, котра є меджі самосправами і орґанізаціями барз облюблена,“ повів председа ПСК Мілан Маєрьскый.

Як додав, тот рік в рамках дотачного проґраму підпорили і родинну самосправу, чім ся „одкрыли двері про далшы інштітуції, котры можуть жадати підпору своїх намірів.“

Понад 600 жадостей

До Вызвы депутатів ПСК было загнаных 607 жадостей, з того підпореных было 530 жадателів. В проґрамі шпорт здобыло дотацію 191 субєктів в сумі понад 713 тісяч евр. Грошы мають іти на оддыховы зоны, накупліня шпортового серсаму, будованя, модернізацію і реконштрукцію шпортовых і дітячіх гріск ці на притулок.

В проґрамі култура депутаты схвалили 294 жадостей в сумі понад єден міліон евр. Дотації ся схоснують на выбавліня і модернізацію културных домів, выбавліня фолклорных ансамблів, реконштруцкію храмів, орґанізацію подій і фестівалів, але так само з них буде робити ся рештавраторьске баданя.

На соціалны службы піде майже 84 тісяч евр у 26-ох підпореных жадостях. В рамках родинной самосправы депутаты підпорили 19 жадателів сумов майже 55 тісяч евр. Тоты грошы підуть на різны родинны події, выбавліня клубовні і чайовні, ставебны роботы в просторах про сеніорів ці оддыховы зоны про родины з дітми і сеніорів.

Тот рік і партіціпатівный розрахунок

Вызва депутатів ПСК є лем єднов із штирьох ґрантовых схем Пряшівского краю. Самосправа давать дотації і в рамках Вызвы председы ПСК, при котрій ся в тім році розділить 500 тісяч евр.

Рекордна сума 3,7 міліона евр є тот рік становлена на Вызву про реґіон, о котрій будуть депутаты вырішовати на найблизшім, юновім засіданю. Тогорічнов новотов є Вызва прартіціпатівный розрахунок з алокаційов 130 тісяч евр, о котрій вырішовали в апрілю жытелі ПСК.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА