День Русинів Словакії одсвяткують в Бардейові, але і в далшых містах

Як інформовав председа Русиньской оброды на Словеньску (РОС) Мартін Караш, орґанізація і їй партнеры припомянуть собі День Русинів Словакії веце подіями в різных містах, де жыють Русины.

Головный проґрам тот рік одбуде ся в центрі історічного міста Бардейов, де в співпраці з містом Бардейов Русиньска оброда приготовила цілонародны святкованя. Подія на Раднічнім намістю одбуде ся якраз в день, на котрый припадать День Русинів Словакії – 12-го юна 2022-го року.

Святкованя в Бардейові

Русиньске свято в Бардейові зачне кройованов процесіцйов, котра піде од Містьской шпортовой салы до центра міста, де пак зачне културный проґрам.

В рамках културного проґраму выступлять русиньскы колектівы і солісты з реґіонів Снина, Меджілабірці, Свідник, Бардейов ці Стара Любовня. Подія буде завершена выступліньом єдиного русиньского професіоналного ансамблю – Піддукляньского умелецького людового субору (ПУЛС).

Події і в Снині а Меджілабірцях

День перед тым, в суботу 11-го юна, одбудуть ся події з нагоды Дня Русинів Словакії в Снині і Меджілабірцях.

В Меджілабірцях місто вєдно з Містнов орґанізаційов РОС і далшыма партнерами приготовили так само богатый проґрам, котрый буде проходити на містнім амфітеатрі. Святкованя зачнуть перед Містьскым урядом, на амфітеатер пак так само перейдуть участници в рамках святочной кройованой процесії.

В Снині в тот самый день одбуде ся в рамках святковань Дня Русинів Словакії далшый концерт в рамках проєкту Русиньскы реґіоны в місті. Представлять ся в нім перед сниньсков публіков Русины з бардейовского окресу як Черговчан, Маріянна Железна ці дуо Шуркаловых.

Концерт приготовило і радіо

Ку святкованю Дня Русинів Словакії приєднало ся і тот рік Народностно-етнічне высыланя Радія і телевізії Словакії в Кошыцях. Радіо уж на 8-го юна приготовило у своїх просторах публічный концерт з назвов Марія Чокинова – голос, на котрый ся не забывать.

У великім радіовім штудію будуть выступати капела Файта і співачкы Марія Мамріллова, Наталія Падова а Михаела Василенкова. Модеровати буде знамый співак і редактор русиньского высыланя в радію Штефан Штець.

По двох роках Духновічів Пряшів

Уж традічно вєдно із святкованями Дня Русинів Словакії одбуде ся і Духновічів Пряшів. Тот цілословацькый конкурз в декламації в русиньскім языку два рокы з причіны пандемії не одбыв ся. Но в понедільок 13-го юна в просторах Театру Александра Духновіча знова буде мож чути русиньске літературне слово в рамках уж 21-го рочника той події.

Як інформовав Караш, з той нагоды представителі русиньскых орґанізацій підуть і під памятник Александра Духновіча, котрый є в Пряшові, жебы припомянути собі жывот і творчость найвекшого нашого будителя.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА