Ден Музыкы Бортняньского

17. жолтня / окторба (субота) о 16.00 год. в музейній церкви свв. Космы і Даміана в Бортным (тепер одділ Музею Дворы Карвациянів і Ґладышів в Ґорлицях) одбуде ся концерт церковной музыкы – Ден Музыкы Бортняньского, в рамках котрого запрезентує ся хор Каменар з Украіны.

Музыка Бортняньского уж не перший раз вызвучыт в рідным селі вітця того знаменитого та світовой славы композитора. Лем в минулым році в тым самым місцы проходил концерт Бортняньскій в Бортным. Цілю обох подій было і єст популяризуваня творчости Димитрия Бортняньского. В суботу 10. жолтня минула 170. річниця смерти композитора. Хоц сам вродил і выховал ся уж поза Лемковином (28. жолтня 1751 р., в Глухові на Украіні), то мал він єй в своім жытю одвидіти. Пережытя, якы в ним по тій ексурсиі остали, нашли оддзеркаліня в пізнійшых комопозициях. Бортняньскій єст єдным з найвыдатнійшых композиторів церковной музыкы XVIII ст.  Вчыл ся в Петерсбурґу, пак вельо років перебывал в Венециі в Італиі. Коли вернул до Росиі, обнял функцию дириґента Царской Хоровой Капелі, был єй тіж пізнійшым директором. Компонувал Бортняньскій інструментальну музыку, оперы і, очывидні, хорову церковну музыку. Найбільшу славу принеслу му Церковны Концерты, по якы сігают днес хоры з цілого світа.

8. серпня 2008 рока в Бортным посвячено і одкрыто памятник Д. Бортняньского, його автором єст ґорлицкій артиста різбяр Здзіслав Толь (актуальний директор Музею Дворы Карвациянів і Ґладышів в Ґорлицях). Його силует выявлят ся з каменя, так як музыка композитора выявляла ся з його коренів, з лемківского серця. Памятник посвятил архієпископ перемышльско-новосандецкой єпархіі, владыка Адам, разом з ґорлицкым єпископом Паісийом в присутности місцевого священника, пароха православной парафіі в Бортным, та вшыткых жытелів села. Памятник поміщений єст коло православной церкви.

Мужскій хор Каменар зо Стрыя в Украіні діє під кєрівництвом Штефана Целюха. Оснований был в 2000 році. През рокы хор выробил свій індивідуальний, музычний стиль, якій характеризує высокій рівен выконаня творів, ориґінальна барва голосів і індивідуальна інтерпретация. Вельократні был нагороджаний на украіньскых конкурсах, фестівалях і переглядах. Концертувал в Польщы, Австриі, Чехах, Словациі і інчых. В репертуарі мат творы заграничных клясиків, сакральны творы, композициі сучасных авторів ци аранжациі патріотычных пісен.