Делеґация словацкого міністерства серед войводиньскых Русинів

Як інформує пресова аґенутра Рутенпрес, вчера (26.10.2016), Рускій Керестур одвиділа делеґация Міністерства Шкільництва Словацкой Республикы, в котрій пришли Секретар Міністерства – Петро Крайняк, та шеф його канцеляриі – Миро Осифчын. Цілю іх візити є заплянувана на заран стріча з Міністерством Освіты, Наукы і Технолоґічного Розвитку Сербской Республикы в Бельграді.

В рамках делеґациі, Крайняк як русиньскій активіста на Словациі, рішыл одвидіти і войводиньскых Русинів. Будучы в Рускым Керестурі делеґация пришла до русиньской ґімназиі ім. Петра Кузмяка. Стрітила іх директорка школы, з котром поклонили ся перед памятником патрона школы. Дальше Крайняк з Осифчыном одвиділи Руску Матку – русиньску орґанізацию, члена Світового Конґресу Русинів. Гостів принял єй председа Дюра Папуґа, з котрым вели дискусиі нт. актуалньных обставин русиньского руху в Сербіі. Делеґация одвиділа і Нацийональний Совіт Русинів в Сербіі.

Посліднім пунктом візиты в Рускым Керестурі была сріча з парохом місцевой грекокатолицкой церкви св. Миколая – о. Михалом Малацком, котрий представил гостям історию той найстаршой русиньской парохіі в Сербіі. Дальше пішли і на церковне приходство, а пак до монастыря оо. Василиянів в Кули. Днес делеґация Міністерства Шкільництва Словацкой Республикы перебыват в Новым Саді.

Петро Крайняк на Міністерство Шкільництва до функциі державного секретаря был призначений в марци т.р. Од молодых років был активний в русиньскым руху на Словациі. Брал м.ін. участ в вшелеякых подіях Русиньской Оброды і так само был єдным з ініцияторів першых стріч русиньской молодежы в Пряшові, з чого пізнійше выникла молодіжна орґанізация Молоды.Русины.

фот. делеґация при памятнику Петра Кузмяка; джерело: Рутенпрес