Деканом лікарьской факулты буде Русин

Лікарьску факулту Універзіты Коменьского в Братіславі поведе Русин. У вольбах о тім вырішав Академічный сенат Лікарьской факулты дня 28. октобра 2014.

До функції нового декана, котрый буде мати свій функчный період од 1. фебруара 2015 р. аж до 31. януара 2019 р., быв звоелный професор МУДр. Юрай Штеньо, Др. н., котрый дотеперь дійствовав як предноста Невролоґічной клінікы Універзітного шпыталя в Братіславі.

Успішный і вызначный неврохірурґ Юрай Штеньо є родаком із русиньского села Кленова (Словацька републіка). Його брат Михал є зясь вызначным ортопедом і довгорічным председом Здружіня інтеліґенції Русинів Словеньска. Штеньо закінчів основну школу в рідній Кленовій, ґімназію абсолвовав уж Братіславі. В році 1966 зачав штудовати на Лікарьскій факулті Універзіты Коменьского в Братіславі, котру закінчів в 1972 році. О три рокы пізніше, в 1975 році, наступив на 4 рокы на Екстерну ашпірантуру на Бурдєнков неврохірурґічный інштітут в Москві. Окрім того абсолвовав і много далшых штудійных стажі в Німецьку, Швайцарії, Словенії і в Споєных штатах Америкы.

Юрай Штеньо од 1972 року аж доднесь робить на Неврохірурґічній клініці Лікарьской факулты Універзіты Коменьского в Братіславі. Окрем того быв роках 1972 – 1974 секундарным лікарьом в Інштітуті народного здоровя міста Братіслава, в роках 1974 – 1977 дійстовав як асістент неучітель на Лікарьскій факулті УК і од року 1977 быв на тій школі десять років фаховым асістентом. Од 1987 р. быв доцентом спомянутой факулты і од року 2002 є професором. Предностом клінікы ся став в 1992 році.

Штеньо є автором многых фаховых статей, передавав лекції на многых конференціях і быв членом дакілько науковых рад, редакчных рад і комісій. Выховав уж і своїх докторандів. Много раз быв за свою роботу нагородженый фаховов публіков дома і за граніцями. З домашніх, словацькых нагород, мож спомянути Хрест князя Прибины 1-ой класы за розвиток неврохірурґії, котрый здобыв в 2007 році од презідента Івана Ґашпаровіча.

Прибинів хрест – то словацька нагорода, котру передавать презідент на пропозіцію словацькой влады або парламенту. Уділює ся жытелям Словацькой републікы, котры ся вызначно заслужыли о господарьскый, соціалный або културный розвиток републікы. Має три класы, з чого 1-ша класа є найвысша. Металь ся уділює все з нагоды выроча взнику Словацькой републікы.

Петро Медвідь