Давид Свєрчыньскій стане до бою в рідній Креници

Лемківскій файтер Давид Свєрчыньскій неодолга стане до бою на рінґу в його рідным місті – Креници. Буде то бій о Медженародний Чемпіонат Словациі в катеґориі К-1. Змаганя пройдут 18. червця/юнія т.р., в креницкій гали Містецкого Осередка Спорту і Рекреациі.

Противником лемківского кікбоксера буде Жану Малкрiядо Круз, файтер родом з Портуґалиі, котрий прожыват в Польщы і выступує як репрезентант вроцлавского клюбу. Давид Свєрчыньскій выступит як файтер новосандецкого клюбу «Fight House 27 Nowy Sącz».

Свєрчыньскій мал уж скорше нагоду станути до бою з Портуґальчыком, лем перед выходом на рінґ Малкрiядо Круз в незнаных обставинах заслабнул, прото бій был одкликаний. Речена подія проходила влони на ґали Flight Exclusive Night 7 в Быдґощы. З особом противника лемківского файтера є більше контроверсий. Не обышло ся без скандалю вчас ґалі в Сопоті, котра проходила в марци т.р. Товды же Портуґальчык втюк з галі і нияк не станул на рінґу (мал ся товды бити з єдным з польскых файтерів). То не перший рінґовий бій Жану Малкріядо Круза (называного тіж «Ганібальом») з лемківскыма файтерами. В січни/януарі 2015 р. програл через нокаут з Павлом Біщаком, Лемком з західньой Польщы.

Свою карєру Д. Свєрчыньскій зачынал як заводник, выступуючий в формулях ляйт і фуль-контакт, здобываючы медалі м.ін. в Чемпіонаті Польщы. Два послідні рокы запоряд выгрывал в Бардийові бій о пояс Медженародового Чемпіона Словациі. Перший раз повело ся му тото досягнути в 2014 році, а о рік, вернувшы на бардиівскій рінґ, повторил тот успіх.

Давід Свєрчыньскій підкрислят свою русиньску приналежніст предовшыткым тым, же на рінґу все выступує в шортах, прикрашеных русиньскым гербом – карпатскым медведьом.

Русины мают більше спортовців, котры змагают ся на боксерскых рінґах во вшелеякых катеґориях, або выступуют з русиньскыма емблемами. На заході Польщы, в Ліґници, прожыват і тренує спомнений выже Павел Біщак – чемпіон Польщы, Европы та Світа в кікбоксінґу К-1. Пару днів тому словацкій заводник, симпатизуючий з Русинами, Павел Ґарай (подібні як Давид Свєрчыньскій носит на шортах русиньского медведя), здобыл два золоты медалі на чемпіонаті Словацкой Республикы в кікбоксінґу.