Дальшы ремонты в Полянах Суровичных

В Полянах Суровичных – селі находячым ся на східній Лемковині, будут продолжаны дальшы ремонтовы роботы. То контунуация реконструкциі муруваной дзвінниці, яка за 65 років попала в цілковиту руіну, а од 2012 рока што деякій час привертана єст єй давнійша подоба.

Як заявил головний орґанізатор ремонтовых робіт в Полянах, в остатнім часі повело ся активістам стрітити з війтом ґміны Яслиска – Адамом Даньчаком, та ґмінным секретарьом, котры приняли до відомости плян робіт на будучий рік. Орґанізаторы ремотну вєдно з ґміном бесідували і о спілпрацы, а сам війт позитивно однюс ся до цілого проєкту. Попри тым, ґміна Яслиска остала партнером проєкту ремонту грекокатолицкой дзвінниці в Полянах Суровичных.

Орґанізатором ремотну сут головні вольонтеры зо Стоваришыня Туристичний Клюб Стикі, Студентского Кружка Бескідскых Провідників Варшава та Стоваришыня Маґурич, котры уж пару років продолжают етапами ратуваня дзвінниці, яка находит ся в неістнуючым днес селі. В 2012 році забезпечены были муры, а в 2014 році прикрыто дах дзвінниці деревяным дахом, якій неодолга буде заступлений зреконструуваным – такым, якій вінчал єй з баньом і крестом перед сімдесятьома роками.

Єдным з головных цілів волонтерів было уреґулювати правний стан дзвінниці. Од 2015 рока властительом ділянкы, на якій ся она находит, стало ся Стоваришыня Грекокатолицкой Молодежы «Сарепта» з Новиці. Тым способом, дзвінниця символичні вернула до грекокатолицкой Церкви.

Проєкт прикрытя даху дзвінниці баньом має быти доцільово ведений в 2017 році. Новий дах з баньом – по шырокых консультациях і збераню опіній – має брати за взір бані над притвором і середньом частю церкви в Вислоку Нижнім на східній Лемковині. Фінальний проєкт вежы-дзвінниці в Полянах Суровичных зрыхтувано, інспіруючы ся як раз тым сусіднім обєктом. Высокіст цілой одбудуваной вежы-дзвінниці, разом з крестом, буде мала нецілых 17 метрів. Высокіст захованых камінных мурів вежы (были они одновлены і зміцнены та вставлено в них выгляды і двері) то 8,6 м, а высокіст проєктуваного даху з баньом то 8,3 м.

Фурт припоминаме, же мож спомочы проєкт ратуваня лемківской дзвінниці, вплачаючы грошы на банковий рахунок Стоваришыня Грекокатолицкой Молодежы «Сарепта».

Даны до конта, на котре мож вплачати грошы то:

76 1500 1559 1215 5003 7213 0000
Stowarzyszenie SAREPTA, ul. Zdrojowa 8, 33-380 Krynica Zdrój
Конечні з дописком: Remont dzwonnicy w Polanach Surowicznych. 

Про детальны інформациі чытайте на сайті проєкту.