Дальша природнича прогулька по Маґурскым Нацийональным Парку

В рамках орґанізуваного Маґурскым Нацийональным Парком циклю прогульок пн. «Гев і тепер», неодолга, 24. червця/юнія т.р., одбуде ся третя уж подія того рода. Тым разом охочых запрашат ся взяти участ в природничій прогульці путьом з Ольхівця до неістнуючого уж русиньского села Вільшня. Початок од 18.00 год. на ольховецкым пристанку.

Маґурскій Нацийональний Парк своім обсягом обнимат деяку част Лемковины, зато дотеперішні прогулькы тыкали все лемківскых сел – тых заселеных доднес, але і вдяка одвиджуваню неістнуючых, пристуны мают змогу познавати історию того, што жыло гев перед сімдесятьома роками. Головном цілю цикличных прогульок є познаваня природы Лемковины через одвиджуваня лемківскых лісів, слуханя жычючых в них птахів та обзераня цікавых ґатунково рослин.

Перша прогулька з циклю «Гев і тепер» одбыла ся 23. квітня/апріля т.р. Товды присутны ішли долином Вислокы, через пут з Розстайного до Незнайовой. Кінцьом мая охочы одвиділи Жыдівскє – село, котре находит ся на граници середньой і східньой Лемковины. Днес – подібні як Вільшня – то порожній простір дикой природы.

Слідте сайт Маґруского Нацийонального Парку, на котрым постепенно будут вказувати ся дальшы пропозициі прогульок.

фот. горі: село Вільшня на мапі з 1851 р.; джерело: Державний Архів в Перемышли.