Чысло на днес – 100.000 – тілько разів сте одкрывали порталь lem.fm в 2015 р.! Дякуєме!

Влони, 7. липця 2014 р., з гордістю обвістили сме, же поєдны стороны нашого порталю lem.fm были одкрыты 100.000 разів за 2014 рік (тоты і дальшы даны за Google Analytics). Забудте о тых даных, бо днес приносиме інформацию о 100.000 одкрыть того рока, котрых нашы чытачы наклікали од 1. січня до 28. мая. То о 40 днів перше, як в 2014 р., што вказує на фурт побільшаючу ся популярніст нашого порталю.

ДЯКУЄМЕ ВАМ ЗА ПРИСУТНІСТ І ДОВІРЯ і обіцюєме приносити іщы більше статій з обшыри вісти, культуры, але не забудеме тіж о части Погляды, де авторы текстів зо свого пункту пізріня коментуют подіі з русиньской заградкы. Не забудеме о части Фафриндя і сконфіскуване (по правді, ани мы не знаме, чом тота част ся так называт, але єй популярніст свідчыт о тым, же называт ся правильні). Не забудеме о вельох інчых функциях нашого порталю: хронолоґічній листі будучых подій, заповіди радийовых премєр, фурт розвиваючой ся базы подкастів, но і чеперато названым (з дедикацийом для любителів слова Етнобізнес) місци, де через інтернет можете купити ріжны книжкы і платні.

Наша штоденна робота то непрестанний контакт з ріжныма інституциями і особами, субскрибция вельох порталів, перманентне перезераня інтернету, гляданя інформаций о подіях, шпортаня в книжках, вшытко прото, жебы сте могли в єдным місци найти як найбільше інформаций о тым, што в лемківскым світі ся діє.

Наша штоденна робота была бы жадна, кєд бы не Ваша – хоснувателів порталю lem.fm – не лем присутніст, але і актывніст. То Вы нам приносите вельо інформаций, высылате знимкы, пропонуєте темы, о котрых бы сте хотіли почытати, інформуєте о подіях. ДЯКУЄМЕ!

Хочеме підкрислити, же порталь lem.fm не розвинул бы ся до такых розмірів без фінансового спертя Міністра Адміністрациі і Цифризациі, котрий в рамках дотациі на охорону, підтриманя і розвиток культуровой достоменности лемківской етнічной меншыны, допомагат фунґуваню нашого порталю в такым виді. ДЯКУЄМЕ!

Чытайте дальшы статі – вкажеме Вам кус статистык з діяльности порталю lem.fm!