Чырчаньска «Чырчанка» рекрутує

Русиньскій Фольклорний Ансамбль «Чырчанка» з Чырча на Пряшівскій Руси, оголашат рекрутацию на членів колективу. Наборова стріча пройде в найблизшу суботу, 1. жолтня/октобра т.р., од 18.00 год. в сельскым Культурным Домі. Ансамбль того рода ініциятиву не назвал традицийно «рекрутацийом», а радше «дньом одрытых двери». Значыт – просят вшыткых заінтересуваных за свою куртину. За ньом вєдно присутны мают  поспівати та погуляти. Колектив позыват хлопців і дівчата в віку повыже 15 років, котры найдут місце в танцувальній та співацкій ґрупі, або знаючы грати на даякым інструменті – в капели. Тых, котры хотят спрібувати своіх сил, просит ся принести зо собом выгідне, спортове облечыня.

Фольклорний Ансамбль «Чырчанка» был обновлений в 2012 році по бодай 22 роках за ініциятивом старосты села Михала Дідика. Його головном цілю являт ся презентация фольклору рідного села на сценах так дома, як і заграницьом. Ансамбль вказує заєдно дівочы карічкы, паровы танці та спів при акомпаніяменті ансамбльовых гудаків.

Чырч, то русиньске село – славне поломницкє місце, в якым, подля записів в парохіяльній кроніці, двом дівчатам объявил ся старец, котрий вштурил в землю палицю. З того місця выплынула вода, яка мала оздоровляючу силу. Пак, старец наказал поставити при джерелі каплицю. Але Чырч то тіж перше русиньскє село за днешньом польско-словацком границьом (село лежыт такой за річком, смотрячы од стороны Лелюхова), прото рекомендуєме одвидіти ансамбль не лем Русинам з Пряшівщыны, але тіж тым, котры прожывают на Лемковині. Сусідство Чырча та Лелюхова і Дубного проявлят ся і в тым, же традицийны кроі ношены в тых селах, сут (были) гейбы такы самы.

Долов – співы в грекокатолицкій церкви Покровы Пресвятой Богородиці в Чырчу.