Чірч є розвиваюче ся село. Буде ся розростати

Село Чірч Старолюбовняньского окресу належыть меджі найуспішнішы і найвеце розвиваючі ся русиньскы села на Словакії. В новембрі в селі одкрыли нову будову матерьской школы, мають там сельску фірму Солиско Чірч, в котрій давають роботу довгодобо безробітным і так собі забезпечують свойпомічно різны роботы.

І кількость жытелів в Чірчі, котрым треба нове бываня, шторік наростать. Староста Михал Дідік інформовав аґентуру TASR, же і зато приготовлюють нову локаліту, де поступно выникне 54 фундушів на будованя. А староста має і далшы планы.

Інвестіцію в сумі 700 тісяч евр буде село фінанцовати з властных жрідел. Часть вытрат бы ся мала вернути самосправі в подобі здобытку за проданя фундушів. Проєкт має веце етап. З першов етапов бы ся мало зачати в яри того року і выникне вдяка ній 18 фундушів.

„За остатніх девять років прибыло в селі сто жытелів, з того 27 минувшый рік а з роснучім чіслом жытелів росне і інтерес о бываня. Хочеме так успокоїти людей, котры мають інтерес о выбудованя хыж, кедьже дотеперь сьме будовали скоріше арендованы квартелі,“ пояснив Дідік.

Нова локаліта на бываня в екстравілані села буде на теріторії 110 тісяч метрів квадратных. Окрім фундушів на бываня ся в ній рахує і з выбудованьом комплетной інфраштруктуры, прибуде і гріско про діти.

За роснучім трендом чісла населіня в Чірчі є подля старосты і творіня новых робочіх місць в селі, выбавленость села, підпора шпорту і културы. „Хотіли бы сьме в селі збудовати і купалиско, жебы родины з дітми мали де быти у вольнім часі,“ додав староста села, котре має приблизно 1300 жытелів і належыть меджі найвекшы русиньскы села.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА