Чест і слава Лосянам!

А особливо Шлянтам, Карелам, Трембачам, іщы раз Шлянтам, і зас Шлянтам, і Шлянтам… Зрештом… посмотрте самы на список.

Ци Лося єст найславнійшым селом Лемковины? – задумували ся денекотры вчены маґістры і професоры недавно в Новици. А мы уж давно знаме, што пенівстю, же так! Шак уж в 1911 році розписували ся о Лосянах ґазеты!

То не лем славным, але тіж барз щырым селом было Лося! Лосяне не жалували ґроша на лемківскы справы і досправдову лемківску аґітацию – в списку горі найдете, хто і кілько з Лосян доложыл ся до Рус(ссссс)кого Народного Фонду «Лемковщина», жебы підперти выборчу пропаґанду. Ішло о тото, жебы честный, рускій патріота о. Гавриіл Гнатишак, як представник Лемків, вошол до парляменту. А аґітация была міцна, а тіж антиаґітация зо страны одорванців, якы нияк не хотіли, жебы лемківскій амбасадор вошол там, де мал ввойти.

То чысто як і тепер. Хоц то на жаль, але амбасадор Лосян праві же прогнал єдну лемківску высланничку, як хотіла ввойти там, де – видно, не єст милым гостьом… Але не тримаме того в памяти. Ани в серци. Чест і слава Лосянам!

Джерело: «Лемко – ґазета для народа» 1911, ч. 9, стр. 4.