Чеськый амбасадор в Пряшові їднав о підпорі турістічного руху і молодежи

Турістічный рух і підниманя навщівности атрактівных місць в краю, як і підпора молодых. То были темы недавного білатералного їднаня веджіня Пряшівского самосправного краю з чеськым послом на Словакії Рудолфом Їндраком.

Нововыменованый чеськый посол навщівив у понедільок 19-го юна 2023-го року Уряд Пряшівского самосправного краю (ПСК) першый раз у своїй функції. Інформовало о тім Одділіня комунікації ПСК.

Надзвычайного і повноважного посла Чеськой републікы в Словацькій републіці Рудолфа Їндрака гостив підпредседа Пряшівского самосправного краю Штефан Бєляк. Стріча была заміряна на проглубліня взаємных чехо-словацькых односин і розшыріня співпраці.

На стрічі інтензівно діскутовало ся о потребі творіня тіснішых партнерств меджі різныма орґанізаціями, і то з цільом підпорити особны контакты і стрічі жытелів обидвох країн з пріорітнов підпоров сполочных актівностей дітей і молодежи.

Помочі тому може наприклад основаня чехословацького фонду владами Чеськой і Словацькой републікы, котрый бы молодым окрім іншого поміг при спознаваню обидвох култур.

Єднов із тем быв і вопрос проглубліня співпраці меджі універзітами, а так само підпора партнерства реґіоналных самосправ і меджі містами а селами. Підпредседа ПСК і чеськый посол занимали ся і ґрупов V4, сітуаційов на Україні, ці сучаснов а будучов помочов тій країні. Обговорили і тему міґрації україньскых гражданів на Словакію і до Чеськой републікы.

В припаді підпоры турістічного руху точніше приближыла ся співпраца меджі Czech turism і Slovakia Travel.

Чеськый амбасадор недавно выразив і свої односины ку Русинам.  12-го юна того року першый раз одбыло ся святкованя Дня Русинів Словакії і в Братіславі.

Святкованя, котры орґанізовав  председа Округлого стола Русинів Словакії Петро Штефаняк, одбыли ся  в Чеськім домі, і святочный приговор окрім председы Округлого стола Русинів Словакії, уповномоченого влады Словацькой републікы про народностны меншыны Ласла Буковско, мав і посол Чеськой републікы на Словакії Рудолф Їндрак.

Тот на події повів, же Чеськый дім є ту і про Русинів, а споминав сполочну історію нашых народів, котра найвеце скапчала ся в рамках 1-ой Чехословацькой републікы.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА