Буздыґаны 2015 признаны. Єден Буздыґан в лемківскых руках!

Недавно заявляли сме о 22. едициі конкурсу Буздыґан Інтернавтів 2015, орґанізуваного інтернетовым сайтом місячника «Польска Збройна» («Polska Zbrojna»), в котрым посеред кандидатів до отриманя нагороды находил ся Лемко – Славко Заґурскій, редактор порталю interia.pl, а колиси тіж редактор радия лем.фм, реалізуючий м.ін. проґрамы на історычны темы («На крылах істориі») та культуральны і музычны авдициі («Раз фрас», «Культуравка»). То тіж спілоснователь Стоваришыня Лемківской Молодежы «Чуга», бывший ведучий Світового Форуму Русиньской Молодежы і бывший член Світовой Рады Русинів. В своіх історычных статях часто вводит русиньскы темы, м.ін. історию Тaлергофу, Руской Народной Республикы Лемків, або ужгородского ансамблю «Русь».

Приносиме Вам милу інформацию. В інтернетовым голосуваню, котре скінчыло ся 15. лютого/фебруара 2016 р., Славко Заґурскій побідил вшыткых кандидатів і спосеред штырьох осіб, достаючы половину голосів од інтернавтів, выграл єдиного Буздыґана, котрий признаваний єст в одкрытым голосуваню. Дальшых шіст Буздыґанів признала комісия, зложена з лавреатів влонишньой едициі та членів редакциі «Польска Збройна».

Буздыґаны то престіжны нагороды для осіб звязаных з войском і мілітариями, а іх названя іде од виду обухового оружа, подібного до булавы, котре хоснуване было до кінця середніх віків, але враз з технічным поступом, з причыны явліня ся в войсковым рынштунку огньострільного оружа, стратило мілітарне значыня, остаючы, подібні як булава, або жезл, декорацийным атрибутом – символом власти, або приналежности до высокого стану.

Торжественне вручыня нагорід одбуде ся 18. марця 2016 р. в Варшаві. Товды же лавреаты отримают посрібрены репликы буздыґанів, ознаку гетманьской власти з ХVI ст. Ґратулюєме!