Буковскый вызывать самосправы одсторонити недостаткы в области языковых прав

Уповномоеченый влады Словацькой републікы про народностны меншыны Ласло Буковскый вызвав писмом меншыновы села і міста одсторонити недостаткы в области дотримованя меншыновых языковых прав.

Реаґовав тым на резултаты Справы о хоснованю языків народностных меншын за період років 2021 – 2022. Інформовав о тім офіціалный сайт Уряду уповномоченого влады СР про народностны меншыны у віторок 2-го мая 2023-го року.

„Зіщены і конкретізованы недостаткы суть векшынов справны делікты, на основі котры може зачати ся справный процес і уділіня фінанчного штрофу,“ інформовав уряд. Як ся дале пише на сайті, на основі писемной вызвы мають села і міста інформацію о способі і терміні одстороніня недостатків загнати до кінця мая, причім уповномоченый їм дав основны інформації о додаваній фаховій і методічній помочі при аплікації меншынового языкового закона.

Послідня оцінка Уряду уповномоченого влады СР про народностны меншыны потвердила довгодобый тренд, подля котрого росне чісло меншыновых сел і міст, котры в максімалній мірі дотримують языковы права.

Тоты інформації выходять із самосправами выповненых анкет, в котрых одповідали на округы вопросів, якы дотуляють ся меншыновых языковых прав. Покля в попереднім періоді з цілковой кількости 638 меншыновых сел і міст было без недостатків 58, з чого было 57 мадярьскых і єдно русиньске, у 2022-ім році кількость наросла на 114, з того 108 мадярьскых і шість русиньскых.

Піднимать ся і чісло прикладных сел і міст, котры законны повинности і можливости аплікують в максімалній можливій мірі.

Припоминаме, же од 1-го марца того року звекшыло ся чісло меншыновых сел і міст подля нового наряджіня влады. Кедь дотеперь было на Словакії 638 сел і міст, де мож было хосновати меншыновый язык, теперь їх є о 125 веце. Русины мають одтеперь 154 сел і міст, дві з того суть міста – Меджілабірці і Свідник, дотеперь мали 66, з чого єдно было місто – Меджілабірці.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА