Буковскый укріплять співпрацу з Радов Европы

Уповномоченый влады Словацькой републікы про народностны меншыны Ласло Буковскый прияв у середу 21-го юла 2021-го року Оксану Томову, надзвычайного і уповномоченого посла Словацькой републікы і постійного представителя Словацькой републікы при Раді Европы.

Буковскый є пересвідченый, же стріча принесе новы імпулзы в области охороны меншыновых прав.

Словацька републікы поступным приятьом Рамкового договору на охорону народностных меншын і Европской харты реґіоналных або меншыновых языків обовязала ся хоронити права народностных меншын і на меджінародній уровни.

„Приятя споминаных документів не быв лем формалный акт, але правны рамкы, котры суть фундаментом меншыновых прав на Словакії, якы ся реґуларно моніторують,“ інформує сайт уповномоченого.

І з той причіны была стріча з Томовов заміряна на зінтентівніня і проглубліня співпраці при просаджованю меншыновых прав. „Партнері доїднали ся, же як першы приготовлять меншыновы языковы мутації приручників о харті меншыновых языків, котры пак публікують на вебсайті Рады Европы і уповномоченого.

Уповномоченый про народностны меншыны так само одкрыв тему зряджіня фонду, з котрого бы меншыновы орґанізації і самосправы могли фінанцовати аплікацію языковых прав.

Оксана Томова є професіонална словацька діпломатка. Штудовала в Петербурзі і походить з Меджілаборець. Декрет на функцію надзвычайного і уповномоченого посла Словацькой републікы і постійного представителя Словацькой републікы при Раді Европы собі перевзяла з рук презіденткы Зузаны Чапутовой в апрілю того року.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА