Буковскый: Проґрамове выголошіня є добра основа. Треба думати і на русиньскый язык

Проґрамове выголошіня влады в области прав і поставліня народностных меншын є солідным штартовным пунктом до далшой роботы в тій сфері. Сучасный уповномоченый влады Словацькой републікы про народностны меншыны Ласло Буковскый оцінив головно обовязок прияти комплексный закон о народностных меншынах, пише аґентура TASR.

„Барз позітівно оцінюю крок посунути далше леґіслатівный замір, котрый наш уряд приготовив. Якраз посередництвом закона уможнюючого комплексно задефіновати і спростіти існуючу леґіслатіву можеме згармонізовати права народностных меншын подля меджінародных пожадавок і очековань самых членів народностных меншын,“ цітовала Буковского TASR.

Аґентура далше інформує, же Буковскый ся в тій справі хоче стрітити з міністерков справедливости Марійов Коликовов. Міністерка бы як председаюча Раді влады Словацькой републікы про людьскы права, народностны меншыны і родову рівность мала леґіслатівный замір передложыти на їднаня владного кабінету.

В припаді роздумованя о розшыріню можливости діяня закона о хоснованю языків народностных меншын на высшы теріторіалны цілкы – значіть самосправны краї, Буковскый припоминать, жебы ся думало нелем на хоснованя языка мадярьской народноснтой меншыны, але і іншых меншыновых языків, наприклад русиньского на выходній Словакії.

„Єднако треба видіти і то, же на уровни высшых теріторіалных цілків не мусть быти проценто конкретной народностной меншыны высоке, но в рамках краю існують окресы, де є їх чісло высоке,“ звернув увагу уповномоченый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА