Буковскый хоче обовязати будучу владу робити на меншыновім законі

Інштітуціоналне посилніня охороны прав народностных меншын, розшыріня прав хосновати меншыновый язык в уряднім контакті і зміна методікы навчаня словацького языка на школах з навчалным языком народностным меншын.

То лем дакотры із кроків і намірів, на котрых хоче в далшім періоді робити партія Most-Híd.

Підпредесове Абел Равас, Петро Крайняк і Аттіла Аґоч вєдно із номінантом свойой партії на посаді уповномоченого влады Словацькой републікы про народностны меншыны Ласлом Буковскым свої планы презентовали в понедільок 16-го децембра 2019-го року на стрічі з медіями. Інформовала о тім аґентура TASR.

Хотять продовжовати в започатых проєктах

Підпедседа партії Most-Híd, котрый є єдночасно і уповномоченым влады Словацькой републікы про ромскы комуніты, Абел Равас на стрічі повів, же в періоді, котрый кінчіть, ся їм подарило просадити веце кроків у области меншыновых языків, школства, културы ці інклузії марґіналізованых комуніт і мають дяку продовжовати в започатых проєктах.

Петро Крайняк, котрый є моментално на посаді державного секретаря Міністерства школства, наукы, досліджіня і шпорту Словацькой републікы, підкреслив ключову роль якостной передпрімарной освіты, котра бы рефлектовала і потребы членів народностных меншын. За його словами партія хоче ся занимати і можливостями зміны встановліня кількости першых клас на середніх школах.

„Хочеме досягнути, жебы каждый член народностной меншына мав шансу дістати ся на школу з навчаньом языка народностной меншыны, но при сучасній сістемі встановльованя першых клас то не все можливе,“ повів Крайняк.

Обовязок про нову владу

Уповномоченый влады Словацькой републікы про народностны меншыны Ласло Буковскый говорив о приготовльованю леґіслатівного заміру закона о народностных меншынах.

„Нашым цільом є приготовити і схвалити дефінітівну верзію леґіслатівного заміру і обовязати будучу владу, жебы до проґрамового выголошіня і леґіслатівного плану дала приготовліня параґрафовой верзії закона,“ цітує аґентура Буковского.

Словацька републіка не має дотеперь приятый меншыновый закон, хоць з такым законом рахує і словацька конштітуція. О законі ся говорило і на новембровім засіданю Выбору про народностны меншыны і етнічны ґрупы з тым, же членове выбору підпорили філозофію леґіслатівного заміру.

Якраз на слідуюче засіданя меншынового выбору, котре буде проходити в януарі, хоче Буковскый принести пропозіцію, жебы ся схвалив обовязок про будучу владу односно того закона.

На Словакії будуть 29-го фебруара 2020-го року проходити парламентны выборы, зато хоче Буковскый схвалити обовязок робити далше на законі іщі перед тым, як ся змінить сучасна влада, в котрій є і партія Most-Híd.

На уряді подля кількости хоснователів языка

Аттіла Аґоч представив на стрічі замір новелізації, котра бы не встановльовала право хосновати язык народностной меншыны в уряднім контакті подля кількости членів народноснтой меншыны в селі або місті, але подля кількости вжывателів. „Аплікачна практіка вказує, же даны о вжываню меншынового языка суть релевантнішы“, повів Аґоч.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА