Буковскый апелує на новы самосправы творити комісії на охорону меншын

В селах, містах і краях, в котрых творять членове народностной меншыны значне проценто в популації, бы могла самосправа створити в рамках своїх порадных орґанів і комісію на охорону прав меншын, пропонує Ласло Буковскый.

Інформацію приносить офіціалный сайт Уряду уповномоченого влады Словацькой републікы про народностны меншыны.

На основі резултатів остатніх выборів почас слідуючіх тыжднів будуть поступно креовати ся новы орґаны міст, сел і высшых теріторіалных цілків. На Словакії є коло 800 сел а міст, і 6 жуп, в котрых членове народностных меншын мають домінантну або значну позіцію.

Векшына тых селі і міст находить ся в Братіславскім, Тырнавскім, Нітряньскім, Баньскобыстріцькім, Кошыцькім і Пряшівскім самосправнім краю. Як пише сайт уповномоченого, охорона прав народностных меншын, як і захованя а розвиток їх ідентічности, мають быти ґарантованы на вшыткых уровнях публічной справы, в селах, містах і жупах.

Уповномоченый влады Словацькой републікы про народностны меншыны Ласло Буковскый звертать увагу нововыбратых представителів містных і реґіоналных самосправ на то, же в смыслі платной леґіслатівы існує можливость подля потревы зрядити різны комісії як порадны, ініціатівны і контрольны орґаны сельского або містьского, і жупного заступительства.

Іде наприклад о комісії, котры будуть коордіновати роботу самосправы з потребами членів народностных меншын.

Уповномоченый апелує передовшыткым на тоты сельскы, містьскы і жупны самосправы, на котрых теріторії суть членове народностных меншын в значній кількости або там мають історічне заступліня, жебы зрядили комісії на охорону прав меншын.

„Поважую за потребне, жебы демократічно выбераны орґаны самосправ дали позітівный сіґнал, же їм не є неінтересный вопрос підпоры і розвитку ідентічности своїх меншыновых жытелів. Пропоную зрядити комісії, котры бы помагали в области меншынового школства, културы і при аплікації языковых прав меншын на містній і реґіоналній уровни,“ цітує сайт уряду уповномоченого Буковского.

„Комісії бы ся мали высловльовати і давати становиска ку пропозіціям обще обовязуючіх наряджінь села, міста і жупы, як і ку приписам нелеґіслатівного характеру, котры можуть мати досяг на охорону або дотримованя прав народностных меншын, приймати становиска і пропоновати крокы з цільом розвитку ідентічности членів народностных меншын на містній і реґіоналній уровни,“ продовжує уповномоченый.

Буковсыкй спринимать шыршу партіціпацію представителів меншын при рішіню справ, котры ся їх дотуляють, і за наповніня їх конштітучных прав.

„Думам, же за остатній період Словакія стала одкрытішов і толерантнішов, што до потреб меншын, і зато вірю, же тота моя пропозіція буде мати потребну одозву,“ закінчів Буковскый.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА