Буковскому при тестованю браковала двоязычность

Через вікенд 31-го октобра і 1-го новембра 2020-го року на Словакії проходило цілодержавне тестованя антіґеновыма тестами на COVID-19. Словацька влада так хотіла ідентіфіковати інфекчных людей, котры наступили до повинной карантены, і тым знижыти розшырьованя коронавірусу і наростаня денных чісел хворых.

На тестоваваню взяло участь понад 3,6 міліона людей, Словакія має притім коло 5,5 міліона жытелів. Іти ся тестовати не мусили люди над 65 років і діти до 10 років віку. Тестованя окоментовав і уповномоченый влады Словацькой републікы про народностны меншыны Ласло Буковскый, котрый підкреслив, же двоязычность мусить быти при такых вынятковых сітуаціях істиннов.

Фалат роботы, но брак двоязычности

Одповідны орґаны на боці державы і містных самосправ выконали величезнну намагу, жебы успішно зреалізовало ся 1-ше коло цілодержавного тестованя на COVID-19, но на многых місцях были порушены меншыновы языковы права, написав на соціалній сіті Facebook Буковскый, на што ся одкликала пресаґентура TASR.

„Я барз скламаный, же много сел і міст, і такы, в котрых членове народностных меншын творять векшыну, на тоту законну повинность забыло,“ написав уповномоченый, котрый єдночасно подяковав самосправам, котры інформації ку тестованю мали і в меншыновім языку.

„Двоязычность мусить быти істиннов при такых вызначных подіях, коли поданьом потребных інформацій даме вклад ку безпечности і охороні жывотів нашых гражданів,“ підреслив Буковскый.

В русиньскых окресах і друге коло тестованя

Влада Словацькой републікы хотіла наперед зробити цілодержавне тестованя жытелів почас двох по собі слідуючіх вікендах. По першім колі і вдяка рекомендаціям фаховців владный кабінет змінив своє рішіня.

Тестованя буде в днях 7-го і 8-го новембра проходити лем в тых окресах, де было зіщеных веце як 0,7 процента позітівных із вшыткых тестованых в данім окресі. Меджі такы окресы належать головно тоты, котры суть на севері Словакії. В тім чіслі і окресы, в котрых є русиньске населіня.

Спомеджі них можеме спомянути окрес Стара Любовня, котрый мав у вікендовім тестованю 2,8 процента інфікованых, Бардейов із 1,67 процентами, Свідник із 1,32 процентами, Стропків із выслідком 1,19 процента, Меджілабірці, де было 1,3 процента, Свідник із 1,8 ці Гуменне з 1,81 процентами інфікованых людей.

Жрідло фотоґрафії: Місто Філяково.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА