Будут святкувати Ден Русинів в Сербіі

В суботу, 18. січня/януара, пройде центральне святкуваня Нацийонального Свята Русинів в Сербскій Республиці. Головны празднуваня пройдут в Шыді. Додатковы подіі присвячены нацийональному дню одбудут ся і в інчых містах протягом тыжня.

Як першы святкувати Ден Русина будут жытелі Бікіча і Вербасу. Гын упамятніня одбудут ся уж в четвер, 16. січня/януара. На сам Нацийональный Ден Русина, якій бачваньскы Руснакы приняли 17. січня/януара, пройдут упамятніня в Дюрдьові, Коцурі, Бачынцях, Новым Орахові, Сримскій Митровици, Рускым Керестурі, Кули і Новым Саді. Всядиль там вказувати будут, што Русины памятают про свою спадковину, історию, што Русины мают свою достоменніст.

Центральны праздуваня Дня Русинів в Сербіі зачнут ся в Шыді архієрейском благодарном Службом Божом в церкви Преображыня Господнього (початок богослужыня о 17.00 год.). На год. 18.15 в просторах Культурно-Просвітнього Дружства «Дюра Кыш» заплянувано етностіл, а дальша част проґраму то одкрытя в голю Општины Шыд о 19.00 год. выставы малюнків з Подобовых Колоній і фотоґрафій Івоны Торма Джамич. Святочна академія одбуде ся о 19.00 год. в Культурным Центрі в Шыді.

Додатково, в неділю, 19. січня/януара, Русины в Бельграді будут мочы взяти участ в святочным проґрамі, котрый пройде по Службі Божій о 16.30 год. в церкви Христа Краля в Бельграді. Дата празднуваня в Суботици Нацийонального Дня Русинів Сербіі буде рішена в найблизшых днях.

Разом то аж 11 місц, в котрых одсвяткуют нацийональне русиньскє свято. Перед місяцьом Русины жыючы в Польщы святкували Ден Русинів в Польщы. Нацийональне свято одзначыло выключні Стоваришыня «Руска Бурса» в Ґорлицях.