Будова резервуару Конты-Мысцова має коштувати мілиярд злотых

Мілиярд злотых буде коштувало побудуваня водного резервуару Конты-Мысцова в долині Вислокы. Інвестиция має уж забезпечены перше 40 млн зл на зрыхтуваня документацийных робіт.

Гармоноґрам робіт звязаных з рыхтуваньом інвестициі представила в Мысцовій Малґожата Вайда, директорка Реґіонального Заряду Польской Воды в Ряшові.

Найважнійше з них, значыт середовискове рішыня, має быти готове до 2022 р., дальшы будут урбаністичны пляны та пляны будовы самого резервуару вєдно з выкупом ділянок. На зламі років 2023 і 2024 повинны ся зачати будовляны роботы на обшыри коло 500 гектарів, котры найдут ся під водом.

Будова тырвала буде до 2027 р. Переселіня жытелів на новы терены, зрыхтуваны на зорґанізуваня нового села Мысцова, тыкати будут 230 осіб з 82 ґаздівок. Новы пляны просторового заґаздуваня, котры опрацуют, будут обнимати індивідуальны потребы переселеных жытелів і комунальны інвестициі. «Нове село буде будуване в пілнічній части Мысцовой выже дорогы, котра буде ішла выже резервуару. Тота дорога буде вела в страну Полян і гын тіж будут орґанізуваны будовляны обшыри» – бесідує Казімєж Міськович, війт ґміны Крампна.

М. Вайда заповіла, што будут ся часто комунікувати з властителями нерухомости, жебы набіжучо розвязувати вшелеякы вантпливости. Ґарантує, што жытелі Мысцовой будут мати найменше два рокы, жебы перенести ся в інче місце. Переселяны мешканці будут мочы м.ін. достати грошы за забудуваня, а за землю замінник в місци, якє выберут. До того вызначено уж терены близко проєктуваного резервуару.

Резервуар Конты-Мысцова має забезпечыти воду до питя для жытелів ясельского повіту, має тіж хоронити перед заливами. Обємніст резервуару вынесе 65 млн кубиків. Самоуряд Крампной хоче записати в плянах будовы, жебы окрем ретенциі воды до питя для 20 ґмін резервуар полнил тіж рекреацийну ролю.

Інвестиция має быти зреалізувана найпізнійше до 2030 р.