Божеска Літургія на граници сел Святкова Велика і Розстайне

В суботу, 13. червця т.р., буде одправлена Божеска Літургія на граници лемківскых сел Святкова Велика і Розстайне. Богослужыня в тым місци має звязок з памятю свв. мучеників о. Павла Швайкы і його жены Йоанны.

Од 9.00 год. буде правлене богослужыня при капличці, котра находит ся на пути Крампна-Бардиів, посеред лісів, на граници з неістнуючым селом Розстайне.

В меджевоєнным періоді, коли Лемкы повертали до православя, о. Павел Швайка і імость Йоанна, служыли найперше в Дошници, пак в Святковій Великій, а потім были делеґуваны на Холмщыну. Там, в 1943 році, в бестияльскій спосіб понесли мученичу смерт. О. Павел і імость Йоанна остали причыслены до лику Святых Мучеників Землі Холмской і Підляшской.

Каплиця, при котрій буде одправлене богослужыня, была вознесена в 1928 році. Тепер находит ся она на териториі Маґурского Нацийонального Парку. Єст єдном з нечысленных православных объєктів, котры не остали знищены по злочыні Акциі «Вісла».