„Бомбель” по русиньскы

“МАК” – мультімедияльний культурно-політычний часопис для молодых, выдаваний в Новым Саді (Сербія) до каждого лютового номеру ґазеты (чысло 1-2 / січен-лютий 2014) долучат книжку Мірослава Нагача Бомбель в тлумачыню Алескандра Мудрого і Томаша Квокы.

Мірослав Нагач (1984-2007) – писатель, вродил і выховал ся в Ґладышові на Лемковині. Студиювал культурознавство на Варшавскым Університеті. Дебютувал в 2003 році книжком Осєм чтери, за котру отримал Нагороду Творчой Фундациі Наталиі Ґалл і Рышарда Полляка. Писал фелєтоны до часопису “Філіпінка”, спілпрацувал з ґазетом “Лямпа”. В його творчости находят ся іщы выданы друком книжкы Боцян і Льоля i Нєзвикле пшиґоди Роберта Робура.

Бомбель то оповіст о жытю сельского пиячка, смішна і смутна заразом. Бомбель – бо так кличут головного героя, цілыма днямы сідит на автобусовым пристанку і оповідат – старчыт лем сісти і зачати ґадати – як сам бесідує. Оповідат о выправі на Словацию, о Циґанах, о проблемах, о вшыткым, але так оповідат, же здавало бы ся прозаічны штоденны справы являют ся о небо цикавшы, вынятковы, інтересуючы і втігаючы, бо проза Нагача заєдно втігат і чарує.