Bloomberg Philantropies достерігат русиньску історию Варголя

Bloomberg Connection од Bloomberg Philanthropies то безплатна аплікация на телефон посвячена штуці і культурі. Од місяця доступный є і діґітальный провідник по Музею Енді Варголя в Пітсбурґу. Інформация о русиньскым походжыню находит ся в першым речыню о родині Варголя.

Аплікация дає можливіст познавати Музей Варголя: ци то будучы на місци, ци поза ним – через знимкы, награня, текст, мапы і награня відео.

«Тот діґітальный провідник по музею уможнює заінтересуваным познати жытя і творчіст Енді Варголя посередництвом ріжных історий і ріжных голосів, такых як вчены, кураторы ци члены родины Варголя» – реляцийонує Ніколь Дезелон, старшый директор до справ наукы і соспільного заанґажуваня. «Аплікация єст выпосажена в ріжнорідны фукнциі злегшаня доступу, може быти хоснувана через особы зо специяльныма потребами вєдно з сенсорныма, тривыміровыма репродукциями з колекциі Варголя» – додає.

Аплікация дозвалят познати вшыткы плянтра Варгольового музею, а прогулька зачынат ся од того найвысшого – семого. Тото посвячене є рокам 1920-1960 і одраз можеме познати родину Варголя.

«He was the youngest of tree sons born to Carpatho-Rusyn parents Andrej and Julia Warhola». Провідник уж в першым речыню подає інформацию, што Енді был наймолодшым з трьох сынів Андрия і Юлиі Варголів – Карпатскых Русинів. Дале почытати можеме і о реліґійности цілой родины, о звыках (нп. рыхтуваню писанок), поміщене є і награня, як мама Варголя співат по русиньскы воскресну пісню. Дуже дознати мож ся і про реляцию Енді з мамом і єй влияня на него. Братанец Варголя, Дональд, споминат, што то його баба Юлия зробила перша рисунок з поливком Кампбеля уж 1952 році. Енді повторил тот мотив десят років пізнійше. Выставу з 1962 рока, на котрій запрезентувано тридцет два полотна з баньками поливкы (кажде презентуюче інчый смак), принимат ся сучасні за зворотный пункт в штуці.

Bloomberg Connects оферує безплатны діґітальны провідникы по культурных орґанізациях на цілым світі. Аплікация є частю діянь Bloomberg Philantropies напряменых на підпераня діґітальных інноваций в штуці.

«Тішыме ся, што завдякы спілпраци з Bloomberg Connects долучыли сме до 350 дальшых культурных просторів» – повіл Дерек Палядіно, директор до српав діґітального заанґажуваня. «Тота аплікация уможнює нам давати анґажуючы пережытя для осіб о ріжных знанях та розвивати і пошырювати нашу діґітальну оферту до одкрываня жытя і штукы Енді Варголя і його величезного влияня».

Bloomberg Philantropies то фундация, яка інвестує в 700 містах і 150 державах на цілым світі, жебы уможнити ліпше і долше жытя як найвекшій кількости люди. Орґанізация зосереджат ся на пятьох основных обшырях творіня тырвалых змін: штуці, едукациі, середовиску, урядовых інновациях і здоровлю. Фундация діє завдякы філянтропійным грошам Мікеля Р. Блюмберґа, американьского бізнесмена, політика, благодійника, бывшого бургомайстра Ню Йорка.