Благодійний концерт для о. Артура Ґрабана

29. січня/януара т.р. в Ліґницкым Центрі Культуры буде проходил благодійний концерт, на котрым збераны будут грошы на одбудову будинку православной плебаніі в Лугах, яку замешкувал о. Артур Ґрабан з родином. Плебания згоріла 30. листопада/новембра минулого рока.

Вчас концерту выступлят: ансамбль Кычера і дітяча ґрупа Кычерка, ґрупа з IV Ліцею в Ліґници, Роман Гавран, CoolBaba та ансамбль Надія. Орґанізатором концерту єст ансамбль Кычера з Ліґниці. Початок концерту то 16.00 год.

О. Артур Ґрабан, настоятель парохій в Лугах і Березі, будинок плебаніі побудувал 17 років тому. В пожарі родина Ґрабанів стратила доробок цілого жыта. В будинку находила ся і документация до ріжных проєктів, архівізуваны документы, компутеры з даныма, як і памяткы, громаджены од 1999 рока. Мешканці Лугів і приятелі священника одраз заняли ся комплетуваньом найпотрібнійшых річы. Завдякы ним родина отримала тымчасово дах над головом. В просторах социяйльной сіти Фейсбук зорґaнізувана была збірка пінязи на одбудову плебаніі. На ден 9. січня/януара зорбано більше як 206 тис. зл.

О. Артур Ґрабан єст менаджером фольковой ґрупы Лемко Тавер, а тіж презесом Стоваришыня Лемко Тавер.