Біциґльова стежка Velo Krynica уж леґальна

Кінцьом грудня/децембра 2021 рока Повітовый Інспектор Будовляного Надзору выдал позволіня хоснувати роверову стежку Velo Krynica.

В 2018 році вчас реализациі проєкту до єй побудуваня схоснували інчы материялы як в документациі, зато інвестицию окрислили як будовляну самоволю і не допустили до руху. Тепер ґміна є близко того, жебы одзыскати веце як 3 млн страченой дотациі.

Дали бетон в місце жывиці

Три рокы тырват леґализацийна процедура і стараня одзызкати дотацию на побудуваня біциґльовой стежкы Velo Krynica. На около 12-кілометрову трасу ґміна выдала близко 5,5 млн зл. Проєкт реализувал попередній бургомайстер Крениці Дариюш Ресько, розрахувати мусіл уж теперішній – Пьотр Рыба.

Близко 3,4 млн зл з выміненой выже квоты мала становити дотация з Европейского Фундушу Реґіонального Розвитку. Грошы не трафили єднак на конто Містного Уряду в Креници, бо стежку вздолж потока Криничанка зробили, як ся вказало, як будовляну самоволю.

Без згоды Маршалківского Уряду схоснували до єй утверджыня зеленый бетон, а не червену синтетичну жывицю, як было ориґінальні подане в документациі. Стежкы не одобрал будовляный надзір, а тым самым Крениця заплатила за цілу інвестицию сама, пак зачала тяжку процедуру леґализациі будовляной самоволі.

Єст згода. Мож іздити

Аж в 2021 році закінчыли проєктовы роботы, а ґміна отримала згоду маршалка воєвідства на зміну материялу, з котрого зробили стежку (єст акцептация, што червену жывицю мож заступити зеленым бетоном).

Додатково малопольскій віцевоєвода Юзеф Лесняк піднял рішыня анулювати в цілости леґализацийну оплату в квоті 175 тис. зл за зроблену в попередній каденциі будовляну самоволю. Кінцьом грудня/децембра 2021 р. Повітовый Інспектор Будовляного Надзору дал позволіня хоснувати стежку.

«По трьох роках повело ся здобыти сім рішынь – позволінь на хоснуваня, котры кінчат справу самовільной будовы роверовой стежкы Velo Krynica без вымаганого позволіня на будову. Перед нами процедура здобыти з унійных середків рефундацию части коштів будовы біциґльовой стежкы» – коментує Пьотр Рыба, бургомайстер Крениці.