Біциґльова прогулька «Путьом Гарасимовича по Лемковині»

На неділю, 8. листопада/новембра 2015 р., Округовий Музей в Новым Санчы зрыхтувал атракцию для любителів двоколесовых прогульок, любителів Гарасимовича і любителів Лемковины – едукацийна біциґльова прогулька «Путьом Гарасимовича по Лемковині». На трасі заплянувано звиджаня церкви в Злоцкым, Астрябику, Поворознику (то церков вписана на Світову Листу Спадковины ЮНЕСКО) та церков в Тыличы.

Зголошати мож ся особисто в Музею Никыфора в Креници або телефонічні: 785 932 569. Початок прогулькы –  о 10.00 год. в Мушыні при Лавочці Гарасимовича (позерайте на знимку горі).

Прогулька орґанізувана єст в рамках ювілею 20-літя Музею Никыфора в Креници. Інавґурация подій проходила 31. січня т.р., о чым інформували сме вас на нашым портали. З остатніх, тырваючых іщы, подій, звязаных з ювілейом, принесли сме вам віст о выставі «Гарасимович в Никыфора». Тоту выставу можете обзерати до 15. лютого/фебруара 2016 рока.

Лавочка Гарасимовича –  пропамятне місце, котре в 15. річницю смерти Єжы Гарасимовича поставили жытелі Мушыны. Поета з Мушыном звязал ся уж в шкільных роках – гын одбывал практыкы як ученик лимановского Лісного Ліцею. Вельократні одвиджал потім в дорослым жытю місточко і околиці, што пак выразил в вершах, напр.: Місточко в Карпатах, Місяц над Мушыном, Мушына – липовий резерват.

На опертю лавкы поміщений єст метальовий місяц і вырытий на ным цитат з верша Місяц над Мушыном: Все коли там вертам, сіджу на лавці з місяцьом [переклад ред.]. Объєкт неодолга мат быти дополнений о різбу поеты. Авторами проєкту лавкы сут Кристина Томасік, Рафал Врона (артиста коваль) та Збіґнєв Ґручеляк (артиста столяр). Одкрытя Лавочкы Гарасимовича одбыло ся 21. серпня/авґуста т.р., а посеред участників ныла жена вмерлого поеты – Мария Гарасимович.