Без вынагороджыня – але з порадным голосом. В Ґміні Устя Рускє глядают експертів

Ґміна Устя Рускє од парох років реализує проєкт «Забытый світ Лемків і Руснаків» вєдно з Ґмінами Зборів і Кружлів та Карпатскым Стоваришыньом. Цілю єст м.ін. зреконструувати бывшу лемквіску корчму, што стояла в центрі села, і створити гын Музей Лемків і Русинів.

Як чытаме в специфіці проєкту, його реализаторы пояснюют, што «проєкт має на ціли удоступнити туристам спадковину Лемків і Руснаків. В звязку з ріжницями в самій соспільности мусят Лемкы і Русины презентувати ріжны пізріня і погляды».

Трансграничный Музей Лемків і Русинів буде мал три локализаиі по обох странах границі: в Зборові – І обєкт Музею – в одремонтуваным ХVI-вічным каштели, в Кружльові – ІІ обєкт Музею – в формі сельской загороды, в Устю Рускым – ІІІ обєкт Музею – зреконструувана лемківска корчма. Веце як столітній будинок розобрали в звязку з будовом ронда в 2009 р.

Прошены експерты од туристикы і од Лемків

На сайті Ґміны Устя Рускє явило ся оголошыня, што в звязку з реализацийом дальшого етапу проєкту ґміна глядат експертів до Ґрупы дс. будовы музейного туристичного продукту – Музею Лемків і Русинів.

Експерты повинны мати знаня з обшыри туристикы або заряджаня туристиком, што потверджене буде одповідніма документами. Окрем того од експертів «очекуєме знаня про традициі, спадковину та культуру Лемків і Руснаків, што мож потвердити діяльністю ци осягнінями в обшыри лемківской та руснацкой культуры і традициі» – пишут в комунікаті.

Цілю діяня Ґрупы є будова туристичного продукту – Музею Лемків і Русинів, та введіня постійных механізмів спілпрацы і комунікациі медже партнерами проєкту. Плянуваны сут 32 стрічы в Польщы і на Словациі (Ґміны: Устя Рускє, Зборів, Кружлів). Стрічы будут онляйн або стацийонарны.

Експерты не будут отримувати за свою роботу вынагороджыня. Заінтересуваны особы можут складати аплікациі до кінця січня/януара в будинку Ґміны Устя Рускє. В аплікациі треба подати інформациі о освіті і культурній діяльности для Лемків і Русинів.

Проєкт спілфінансуваный є з середків Проґраму Трансграничной Спілпрацы Interreg V-A Польща-Словация 2014-2020.

Фот. Пьотр Ґаборек, Туристична Інформация Ґміны Устя Рускє