Бескідско і з лемківскым акцентом

Містецка Публична Бібліотека в Яслі просит любителів доброй книжкы на XV Ясельскій Літературный і Реґіональный Фестіваль. Подія, котрой головным мотивом є госло «Поезия і проза на дорогах і порожніх полях», пройде в днях од 27. вересня/септембра до 10. жолтня/октобра.

«З нагоды 15-літя Фестівалю хочеме навязати до його первістной назвы – Фестіваль Поезиі і Прозы, а тіж іщы міцнійше закоренити ся в тым, што єдночасні літературне і реґіональне» – бесідує Дорота Возніца, директорка Містецкой Публичной Бібліотекы в Яслі. «Зато тіж до участи в фестівальовых подіях запросили сме авторів звязаных з Яслом, ясельском земльом і Низкым Бескідом» – продолжат директорка.

На участників Фестівалю ждут три темовы стежкы: Дорогы і порожні поля, В ліричным Яслі та Дітячы страны. Гістми будут: Анджей Стасюк – польскій прозаік і есеіста, котрый на добре уж вріс в Низкій Бескід, беручы за місце прожываня перше Ольховец пак Чорне і Воловец; Йоанна Консего – ґрафічка, ілюстраторка, авторка м.ін. окладинок новых выдань книжок ноблисткы Ольгы Токарчук; Пьотр Марецкій – автор експериментальной літературы і книжкы дорогы, жытель Ясельщыны; Роберт Круль – Яслянин, поета; Йоля Ріхтер-Маґнушевска – авторка і ілюстраторка книжок для діти, жытелька Низкого Бескіду.

Про книжку, котра безпосередньо тыкат лемківской істориі і Лемковины, буде мож побесідувати з Маньом Стшелецком, авторком публикациі «Бескід без кіту», котру так само і ілюструвала. Ліричні о Лемковині пише Катажына Шведа, авторка дебютантской збіркы пн. «Босорка».

«В рамках товаришучых подій запрашаме на выставу фотоґрафіі Пьотра Марецкого пн. «Придорожна Польща» та на літературно-еколоґічны варштаты в Осередку Еколоґічной Едукациі в Ожынній, а тіж на прогульку по Низкым Бескіді з Мацєйом Маґнушевскым – природником і еколоґом» – запрашат Дорота Возніца з ясельской бібліотекы.

Чысло місц на поєдны подіі ограничене. Дармовы білеты входу доступны сут в Головній Чытельни Бібліотекы в Яслі. Фествіаль дофінансувано з середків Міністра Культуры, Нацийональной Спадковины і Спорту з Фундушу Промоциі Культуры.