Бескідник #98 специяльный – пятниця, 13.00 год.

Бескідник. Так ся называт ґеоґрафічно-туристичный радийовый проґрам, котрый веденый єст Якубом Зиґмунтом в кажду пятницю од 13.00 до 14.00 год.

Просиме слухати найблизшый одтинок Бескідника в пятницю 7. серпня/авґуста 2020 р. Буде то уж 98. одтинок того проґраму і першый з трьох специяльных, якы заперают цілу серию. Так, як сме інформували в червци, ера Бескідника приближат ся ґу кінцьови і зато тым барже заохочаме слухати проґрам.

Підеме на малу вандрівку з села Війкова недалеко Мушыны і дійдеме до перевалу, де находит ся Королівска Студня. Дознаме ся про історию того місця, як тіж почуєме кус практичных інформаций, як там ся достати так од польской, як і словацкой стороны.

А чом іщы вартат слухати тот одтинок? Сут три причыны, котры Вас одраз переконают:
– одтинок буде посвяченый Богданови Ґамбальови, шефредакторови радия Лем.фм, вмерлому 2. липця/юля 2020 р. Зато як раз ідеме на польско-словацку границю, бо обшыр з другой страны Карпат він барз любил. Послухаме тіж музикы такой яка му ся найбарже любила в Бескіднику.
– одтинок буде першый раз веденый по лемківскы. Еволюция мусит іти дале – од польского проґраму, через польско-лемківскій, аж вкінци лем лемківскій.
– в тым одтинку підеме остатній раз на даяку вандрівку. Кєђ Вам бракує оповісти з туристичных пути і гірскых доріг, слухайте конечні Бескідника в найблизшу пятницю, бо пізнійше уж го не буде.

Чуєме ся, як все, о тринадцетій! На заохочыня вказуєме пару знимок з околиц Війковой і Королівской Студні.

джерело знимок: Wikimedia Commons