Бесіды Сільвіі Бруні з Лемками #3 – Aнна Рыдзанич

В середу 16. квітня/апріля тр. о год. 9:15 просиме слухати бесіду з Анном Рыдзанич. Інтервю зробила Сільвія Бруні, польска Італиянка (або італияньска Полька), котра – захоплена Лемковином – рішыла як найліпше єй познати.

Анна Рыдзанич (вр. 1985 р.) – Лемкыня, учытелька лемківского языка, абсольвентка росийской філолоґіі з русиньско-лемківскым языком на Університеті Нацийональной Едукациі в Кракові. Од 2012 рока вчыт лемківского языка в школах на Лемковині (обшыр Ґміны Устя Рускє). Наштоден жыє в Ганчові, в своім рідным селі. Інтересує ся лемківскыма обрядами.

«Лемківскы Оповісти: Мультікультурова Подорож через Сучасніст». То мультімедияльный проєкт, реализуваный в 2024 році, котрого цілю было приближыти культуру, історию і сучасне жытя Лемків. В рамках сериі возникло 10 авдийоподкастів, в котрых мож почути бесіды з поетами, активістами, професорами, тлумачами, молодым поколіньом Лемків.

За проєкт одповідала Сільвія Бруні, вроджена в Італиі теоретичка музикы, яка од 15 років мешкат в Польщы, а перед парома роками залюбила ся в лемківскій культурі. Єй стараньом была печатана перша антолоґія лемківской поезиі в тлумачыню на італияньскій язык. Подкасты доступны сут в польскым языку, товаришыт ім інтерактивна мапа на сайті siliva.lem.fm.