«Бесіда» з календарьом на 2024 рік

Традицийно в посліднім місяци рока трафлят до нашых рук як раз остатня тогорічна «Бесіда» – пресовый орґан Стоваришыня Лемків. То ч. 6 (195) за місяці листопад/груден 2023 р. Тото святочно-новорічне чысло приносит нам традицийно «Календар Бесіды на 2024 рік», якій радо вішаме в нашых хыжах.

Теперішній номер витат нас уж святочно-новорічно. При нагоді богатый є в сучасну русиньску творчіст – презентуваны сут творы учасників ХХХІ Лемківской Творчой Осени, яка проходила в днях 7.-8. жолтня/октобра в Высовій і Ґорлицях. Прочытати можеме м.ін. оповіданя Павла Ксенича під наголовком «Богдан и інчы». Є тіж выімок з Орвельовской «Звірячой Фармы», якой тлумачыня до лемківского языка зробил Петро Криницкій.

Окрем того в посліднім выданю за 2023 р. прочытаме м.ін. статі:

• Севериян Косовскій, Смутны результаты спису. Хоц є нас штораз веце, штораз меньше Лемків бесідує по лемківскы…;
• Мирослав Воргач, XVI Стрічы Трьох Поколінь; 
• Петро Трохановскій, Астрябова Лемківска Творча Осін;
• Севериян Косовскій, Парох Сандецкой Руси;
• Петро Трохановскій, Публіцистика Юліана Тарновича на сторінкаx часопису „Наш лемко” – єднодумный погляд терцету сучасных украіньскых науковців; 
• Петро Медвідь, Вмер вызначный русиньскій вченый, історик Іван Поп;
• Севериян Косовскій, Вафчане хотят поставити пропамятный крест.

Можеме запознати ся з цілым шором подій, якы проходили в нашым русиньскым світі – о тым доности част «Новины, не новины – не лем з Лемковины». Не бракує і передруків з інчых часописів і ґазет, што тыкают нашых справ.

Но і найважнійше – послідня «Бесіда» є з додатком. То славный і уж культовый «Календар Бесіды на 2024 рік», якій найдете в середині. Окрем церковных праздників позначыли сме в календари на будучый рік і наше нацийональне свято – Ден Русинів Польщы, якій припадат на 5. грудня/децембра. Купуйте, а календар буде ваш.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.