Бесіда з Димитрийом Русинком з нагоды річниці основаня Стоваришыня Лемків – віторок, 21.10 год.

З нагоды річниці основаня Стоваришыня Лемків, запрашам на бесіду з п. Димитрийом Русинком, котрий пояснит нам, што значыт быти для него Лемком, в якых обставинах пришло му было брати участ в основаню першой по выселінях лемківской орґанізациі в Польщы, яком было Стоваришыня Лемків. Будете мати тіж змогу почути пару слів про його жытя іщы на Лемковині, одкале был выгнаний, коли мал лем 6 років.

Димитрий Русинко вродил ся  8. вересня 1941 рока лемківскым селі Перунка. На переломі 1988/89 р. брал участ в покликаню Стоваришыня Лемків, пак долгы рокы был ведучоым Кружка Стоваришыня Лемків в Ліґници, был тіж чынным членом Головного Заряду той орґанізациі.

Димитрий Русинко, як го окрислил сам ведучий СЛ – Андрий Копча, то няньо-нестор той першой, по выселінях орґанізациі в Польщы.

26 років тому, 5. марця 1989 рока, в Ліґници была заложена перша по выселіню, незалежна, соспільна лемківска орґанізация. То Стоваришыня Лемків, доднес найвекша лемківска орґанізация в Польщы.

На заложытельскым зобраню принято статут і тымчасовий заряд, котрий мал формальні довершыти реґістрацию. До заряду выбраны были – Андрий Копча – ведучий заряду, Штефан Косовскій і Петро Трохановскій, як його заступці, секретарьом остал Ярослав Горощак, Штефанія Дубец – скарбником, а членами заряду – Ярослав Хомяк, Штефан Дичко, Богдан Ґамбаль, Владимір Горбаль, Тома Молодчак, Миколай Падухович, Димитрий Русинко і Ярослав Зволіньскій.

На стрічы в Ліґници присутны были тіж про-украіньскы діячы, котры не хотіли записати ся до новой орґанізациі. Адміністрацийний выділ воєвідского уряду в Ліґници зареґіструваал стоваришыня 7. квітня 1989 рока.

Стоваришыня Лемків было медже інчыма ініциятором введіня лекций лемківского языка до основных і середніх шкіл, як тіж орґанізуваня лемківской філолоґіі.

Інформацийным журналістычным орґаном стоваришыня єст двомісячник „БЕСІДА”, котрой перший номер вказал ся 30. червця 1989 рока.