«Бесіда» на Великден

Другій тогорічный номер двомісячника Стоваришыня Лемків – «Бесіда», ч. 2 (191) за місяці марец/квітен 2023 р. – єст уж доступный. Часопис явил ся друком такой перед Великодньом, так жебы сме могли собі на тот святочный час почытати рідне слово.

В новым номері часопису прочытаме м.ін. статі:

• Петро Медвідь, «Єм єден з вас», гварил Якубиско. Вмер вызначный словацкій режисер з русиньского Койшова;
• Наталия Малецка-Новак, В Ґміні Устя Рускє глядают експертів;
• Севериян Косовскій, Studium Carpatho-Ruthenorum вертат по перерві;
• Севериян Косовскій, Нештоденны істориі – Лемковина;
• Петро Трохановскій, Никыфоры з колекциі Центра Культуры в Креници;
• Петро Трохановскій, О тым як жытя приносит несподіванкы;
• Петро Трохановскій, Тридцет років лемківскых альманахів;
• Петро Трохановскій, Василь Долгович;
• Василь Сочка-Боржавин, Александер Духнович.

В одкрываючій номер части «Новины, не новины – не лем з Лемковины» находит ся спис найважнійшых подій з нашого русиньского світа за період двох остатніх місяців. Пак можеме познати тексты тыкаючы нашых і меньше нашых справ в чужых языках, прим. по польскы ци словацкы.

В часописі поміщене і обшырне інтервю Наталиі Малецкой-Новак з незнаным дотля в лемківскым світі Давидом Здобыляком, якій має наш рід – што оддзеркалят його творчіст. Інтервю можете прочытати тіж на нашым портали.

Част выміненых горі наголовків то принагідны статі (до округлых річниц), як о Духновичу, Долговичу ци лемківскых альманах – значыт «Лемківскых Календарях», пак названых «Лемківскыма Річниками», котры выдає каждый рік Стоваришыня Лемків.

Двомісячник «Бесіда» то часопис Головного Заряду Стоваришыня Лемків, выходит од 1989 рока, присвяченый єст збережыню істориі, культуры і языка Лемків, інформуючый о жытю нашой і братніх нам соспільности, плекаючый вірні надіі прадідів і вітців.

«Бесіду» мож почытати в бібліотеці Руской Бурсы в Ґорлицях, котра отворена єст од понеділька до пятниці в год. 9.00-15.00, або по індивідуальным догваріню в інчым терміні. Ґазета є тіж доступна в локальных Кружках Стоваришыня Лемків в Польщы.

Найновшый номер, як тіж архівальны номеры часопису «Бесіда» годны сте придбати в електронічній версиі на сайті www.stowarzyszenielemkow.pl.