Беатіфікація Петра Павла Ороса перенесе ся

Правліня Мукачовской ґрекокатолицькой єпархії в четверь 24-го апріля 2025-го року інформовало, же дата беатіфікації нового священомученика Петра Павла Ороса мусить перенести ся.

Беатіфікація мала одбыти ся в селі Білкы на Підкарпатю 3-го мая того року. Як правліня єпархії інформовало, беатіфікація не зрушыла ся, але перекладать ся на іншу, теперь іщі незнану дату. Єпархія пояснила, же буде треба почекати на рішіня нововыбраного Святішого Отця.

„Почас остатніх днів, од смерти Папы аж до вечора середы, мы вели постоянный і завзятый діалоґ із Апостольсков нунціатуров на Україні, котрій подарило ся сконтактовати із одповідныма особами з Колеґії кардіналів,“ пише ся в офіціалнім выголошіню єпархії.

„Почас тых конзултацій дізнали сьме ся, же деякы з потрібных документів, котры мав підписати Святішый Отець Франціск про завершальне проведжіня беатіфікації, не встиг підписати почас жывота. В повязаню з тым проведжіня торжества беатіфікації на даній етапі стало неможливым.“

Як далше Мукачовска єпархія інформує у своїм выголошіню, з порозуміньом прияло правліня єпархії тото рішіня Колеґії кардіналів, і высловлює вдячность вшыткым, котры проявили знакы солідарносати і підтримкы єпархії.

Єпархія просить вшыткых, жебы з довіров поставили ся ку тій сітуації і терпеливо очековали далшы офіціалны інформації. „Такой як будуть новины з Ватікану, мы обовязково о них будеме інформовати.“