Моритаты та леґенды про село Ладомирова – проєкция фільму в ЗША

Карпаторусиньскє Общество просит на проєкцию фільму про русиньсє село Ладомирова, котра одбуде ся в суботу, 16. січня/януара 2016 р., в Філядельфіі (Philadelphia City Institute, 1905 Locust Street Philadelphia).

Фільм представлят часто гумористычний і веселий вид осмерох ріжных осіб, котры наштоден прожывают на Пряшівскій Руси в селі Ладомирова. Представлят субъєктывний погляд, спомины з минулых подій, котры досвідчыли Русины з того села. Фільм про його жытелів односит ся головні до періоду І та ІІ Світовых Воєн, як тіж вказує деякы рокы уж по закінчыню воєнных змагань. Вшыткы тоты подіі дают акцент на радіст, але і нужду Русинів з тамтой части Карпатской Руси. Фільм з 1998 рока тырват нецілу годину, є по части в русиньскым языку з анґлицкыма написами.

По проєкциі передвиджений дискусийний панель, в котрым присутны будут мати змогу звідати і вымінити ся одчутями і поглядами.

Більше інформаций про речену подію – за тым мотузком.

Ладомирова то русиньскє село, котре находит ся на Пряшівскій Руси в свидницкым окресі. Перша інформация о селі походит з 1414 р.  В селі находит ся деревяна грекокатолицка церков св. Михала Архангела з 1742 р., котра в 2008 р. была вписана на Листу Світового Дідицтва ЮНЕСКО. Вчас ІІ Світовой Войны был нашкоджений правий бік іконостасу, котрий одреставрувано в 1946 р. Церков представлят традицийний лемківскій тип диспозициі храму. Вызначныма жытелями Ладоміровой были м.ін. Миколай Гвозда (1926-2010) – русиньскій писатель і фольклориста, та митрополита Лавр (Шкурла), котрий был єрархом в юрисдикциі Руской Православной Церкви Заграницьом. Днес село чыслит близко 1000 жытелів.