Автобусом з Крениці до Бардийова? Быти може

Тырвают стараня, жебы урухомити автобусове получыня медже Креницьом а Бардийовом. Сут вшыткы позволіня.

Стараня, жебы урухомити автобусове получыня медже Креницьом а Бардийовом зачали ся іщы в 2017 році. По шестьох роках справа є такой довершена. Перше словацкы переписы не дозваляли урухомити самоурядовы получыня.

Не лем Бардиів-Кренция, але і Попрад-Закопане ци Стара Любовня-Пивнична

«Зміна вошла в жытя в 2019 році і до того моменту словацкы самосправны краі можут уж фінансувати автобусы выходячы поза границю державы, што як першый схоснувал кошыцкій край – урухомил самоурядову ленію з Кошыц на Мадяры» – пояснят Якуб Лоґінов з громадяньской ініциятивы «Польща-Словация-автобусы».

«В черговых роках пряшівскій і кошыцкій краі основали спільного орґанізатора транспорту для цілой східньой Словациі IDS Východ, котрый зачал творити новый зінтеґруваный систем публичного транспорту. В транспортовым пляні IDS Východ находит ся пару автобусовых получынь до Польщы, в тым ленія Бардиів-Кренция, Попрад-Закопане ци Стара Любовня-Пивнична, котры мают урухомити єдна по другій. Як раз тепер пришол час на реализацию першого по шорі получыня, значыт Бардиів-Крениця, закля го не урухомлят, не буде дальшых» – пояснят Лоґінов.

Як інформує пресова представничка пряшівского краю Даша Єленьова, в послідніх місяцях рыхтували необхідны формальности звязаны з урухомліньом трансграничной леніі. По польскій страні заплянуваны сут три затриманкы, вшыткы в Креници. Власти курорту дали уж позволіня хоснувати тоты пристанкы.

З польской страны вшыткы згоды сут

«Пряшівскій край буде консеквентні продолжал протягом 4 років постепенну реализацию тыкаючу трансграничных автобусів, згідні з принятым транспортовым пляном. В плянах є м.ін. получыня на трасі Стара Любовня-Пивнична (доцільово Вышні Ружбахы-Стара Любовня-Пивнична), де такой ціла траса веде через територию Словацкой Республикы. І в першым, і в другым примірі то получыня важных туристичных і курортных осередків по обох странах державной границі, з потенциялом значучых синерґічных ефектів в економічній, соспільній і культурній сферах» – повіла Єленьова.

Згоду на хоснуваня пристанків для трансграничной леніі выдал тіж Маршалківскій Уряд Малопольского Воєвідства. Мимо то дале не знатя, коли піде авутобус з Крениці до Бардийова. Політична криза уряду в Братиславі рыкошетом вдарила в словацкы самоуряды, а конкретно – в фінансуваня ґмін. Експерты з громадяньской ініциятивы «Польща-Словация-автобусы» алярмуют, што без інтервенциі малопольскых самоурядовців, посланців і дипломатичных служб справа може ся не довершыти на посліднім єй етапі.

Петиция до Міляна Маєрского

«Важне, жебы автобус урухомили перед заплянуваныма на червец/юн Европейскыма Іграми. То ідеальный момент на промоцию трансграничных получынь, зато вірю, што тота спортова імпреза в получыню з автобусом Крениця-Бардиів може ся стати новым імпульсом для розвитку польско-словацкой спілпрацы» – подає Якуб Лоґінов.

Попертя о скоре урухомліня автобусів Бардиів-Кренция може высловити каждый. Старчыт підписати петицию до пряшівского жупана Міляна Маєрского, котру мож найти за тым мотузком.

Бардиів то єдно в красшых місточок Словациі. В 2020 році центр міста вписали на список світовой спадковины UNESCO.