Архієпархіяльний одпуст в русиньскым селі Чырч

В днях, 29.-30. серпня т.р., в селі Чырч на Пряшівскій Руси буде проходил архієпархіяльний грекокатолицкій одпуст на праздник Успіня Пресвятой Богородиці.

Праздник зачне ся в суботу 29. серпня процесийом зо села на Марияньску Гору, де, по посвячыню воды, молитвах, проповіди і Святій Літургіі, вірны зыйдут до села, жебы одслужыти панихіду при гробах чырчаньскых парохів, а пак од 21.00 год. Всеночну в тамтышній грекокатолицкій церкви Покровы Пресвятой Богородиці.

В другій ден свята, в неділю, од самого рана в чырчаньскій святыни буде служений Акафист до Пресятой Богородиці, Божеска Літургія а пак процесия на Марияньску Гору, де торжественном Літургійом скінчыт ся архієпархіяльний успеньскій одпуст.

Веце інформаций долов на залученым афішы.

Чырч то русиньске село – славне поломницкє місце, в якым, подля записів в парафіяльній кроніці, двом дівчатам объявил ся старец, котрий вштурил в землю палицю. З того місця выплынула вода, яка мала оздоровляючу силу. Пак, старец наказал поставити при джерелі каплицю.

Дівчата оповіли селянам, што ся стало на горі, але люде ім не повірили. По тым, на село пришла катастрофа – великы выливы і аж товды люде рішыли збудувати на тым місци каплицю Успіня Пресвятой Богородиці.

Чырч то перше русиньскє село за польском границьом (граничыт з лемківскым селом Лелюхів), з той тіж причыны перед выгнанями русиньского населіня з Лемковины, вельо Лемків з той части Лемковины ходило на праздникы на Пряшівску Русь, м. ін. до сусіднього Чырча.