Архівальний фільм з 2. правдивой Лемківской Ватры в Чарній – 1984 р.

Просиме до обзераня фільму з 2. Лемківской Ватры в Чарній в 1984 році. Якіст запису не єст найліпша, але його дух і атмосфера проникают гет до кости. Слеза ся може тіж закрутити в оку, бо напевно вельох тых, што будут обзерати фільм, товды іщы не было на світі, а тых, што гын ся находят, тіж уж декотрых неє медже нами.

Позерайте, як то колиси было. Хто был заанґажуваний і в якым рівни. Посмотрте, як тото свято направду выглядало і яка є ґенеза нашого одроджыня по выселіню. Не было чужых фан, склепів з пивом і мясом з ґріля, а вшыткы зосереджены были на тым, што ся діє на «сцені». Была там Лемковина, были конкурсы і патріотичны акценты і было вельо Лемків. Тот фільм вказує, як далеко пішла асиміляция і ґлобалізация, яка для нашого народа є смертельном небезпеком.

Відео было накручене паном Петром Басалыґом, а до діґітального виду привели сме го мы – Бурсакы. На жаль, нагрываний был сам образ, прото як підклад шумні співат єдиний можливий выконавця – ансамбль Лемковина під батутом Маестра Ярослава Трохановского.

Обзерайте на здоровля! Найдте свого няня, тету, стрыка і сусіда. Кєд знате, хто презентує ся як прекрасна місс – напиште, бо мы не познаєме :). Кєд видите на тым відео дакы інчы особы, активно заанґажуваны в орґанізацию Ватры – напиште, то дополниме інформациі.