Апостол – Неділя самарянкы. Чытаня з Діл святых апостолів – неділя 11.00 год.

Чітаня з Діл святых апостолів

По смерти Стефана зачало в Єрусалимі пронаслідованя. А тоты, котры ся порозутікали, пришли аж до Фінікії, Кіпра і Антіохії.

А никому не проповідали слово (Боже), лем Жыдам. Но дакотры із них были з Кіпра і Кірінеї, а кідь пришли до Антіохії, бісідовали з Ґреками і звістовали їм Господа Ісуса. Рука Господа была з нима, а дуже много (народа) увірило і обернуло ся ку Господу. Гудку о них зачула і Єрусалимска Церьков і зато послала Варнаву аж до Антіохії. Коли там пришов і увидів благодать Божу, потішыв ся і напоминав вшыткых, штобы щірым сердцьом ся тримали Господа. Бо він быв муж добрый, повный Святого Духа і віры. А много народа увірило в Господа. Потім одышов Варнава до Тарса глядати Савла. Нашов го і привів до Антіохії. Цілый рік ся сходили в церькви і учіли много народа. В Антіохії были ученикы першый раз названы хрістіяне. В тоты дні пришли з Єрусалима до Антіохії пророкы. А єден із них, званый Аґав, встав і ведженый Духом пророковав, же на цілім світі буде великый голод. А і быв, за цісаря Клавдія. Тогды ученикы установили, же каждый хто як годен, поможе братам жыючім в Юдеї. Так і зробили, а (жертву) послали старшым через Варнаву і Савла.

Апостол на неділі і свята в русиньскым языку выдало Общество св. Йоана Крестителя. Коректы до тлумачыня вводил екзарх пражского екзархату для грекокатоликів в Чешскій Республиці преосвященый владыка Іван Лавинець.

Апостол на неділі і свята мат імпріматур грекокатолицкого пряшівского єпархы, преосвященого владыкы Йоана Гіркы.