Апостол – 6. Неділя по Сошестві Святого Духа – неділя 11.00 год.

Чітаня з Письма святого апостола Павла Рімлянам

(Братя), маме много дарів (Духа) подля благодати, котра нам была дана: хто мать дар пророцтва, най пророкує подля міры свойой віры. Хто мать дар службы, най служыть. Хто мать дар учіти, най учіть. Хто знать напоминати, най напоминать; хто давать, най давать щіро, хто веде другых, най буде натхненый. Хто ся старать о терплячіх, най помагать із радостьов. Любов най буде без фарізейства, ненавидьте підле, тримайте ся доброго. Любте ся як братя, перебігайте єден другого в даваню чести. В пильности не будьте лінивы, духом будьте горячі, служте Господу! Радуйте ся з надії, в бідах будьте терпезливы, перебывайте в молитві. Майте порозумліня про потребы святых, ку гостям будьте щіры. Благословте тых, котры вас пронаслідують, благословте, а не проклинайте!

Апостол на неділі і свята в русиньскым языку выдало Общество св. Йоана Крестителя. Коректы до тлумачыня вводил екзарх пражского екзархату для грекокатоликів в Чешскій Республиці преосвященый владыка Іван Лавинець.

Апостол на неділі і свята мат імпріматур грекокатолицкого пряшівского єпархы, преосвященого владыкы Йоана Гіркы.