Апостол – 20. неділя по Сошестві Святого Духа – неділя, 09.30 год.

Чітаня з Писма святого апостола Павла Ґалатянам – зачало 200. (1.; 11-19)

(Братя), оголошую вам, же євангеліє, котре я проповідав, не є (діло) людей, бо я його прияв і научів ся не од чоловіка, но з появліня Ісуса Хріста. Вы чули, што я перед тым робив в жыдівстві, же я барз пронаслідовав і нищів Божу Церьков. В жыдівстві я быв ліпшый як многы ровесникы мого роду і быв я веце натхненый за обычаї отців, як они. Но коли тому, котрый собі мене выбрав уж в тілі мойой матери і закликав свойов благодатьов, залюбило ся одкрыти у мі свого Сына, жебы я його проповідав поганам, я нияк не радив ся з тілом і кровльов ани я не ішов до Єрусалима ку тым, котры были апостолами скорше як я, но я одышов до Аравії і знова ся вернув до Дамаска. Потім, по трьох роках, я ішов до Єрусалима спознати ся з Петром, і зістав єм у нього пятнадцять днів. Другых апостолів я не видів, окрім Якова, котрый быв братом Господа.