Апостол – 12. Неділя по Сошестві Святого Духа – неділя 09.17 год.

Чітаня з Першого письма святого апостола Павла Корінтянам.

(Братя), знова вам говорю о Євангелію, котре я вам проповідав, котре вы і прияли, котрого ся і тримате. Через нього будете і спасены, кідь його дотримате так, як я вам його проповідав — бо вы не увірили даремно. Самоперше я передав вам тото, што і я тыж прияв, же Хрістос умер за нашы гріхы, як учіть Письмо; быв похованый, а на третій день воскрес, як учіть Письмо. Появив ся Петрови, потім дванадцятьом. Потім ся пойявив веце як пятьсто братам вєдно. З них веце як половина жыє дотеперь, но дакотры уж умерли. Потім ся появив Яковови і знова вшыткым апостолам. А з вшыткых послідньому — як недоноскови — появив ся і мі. Бо я найменшый із апостолів і я недостойный называти ся апостолом, бо я пронаслідовав Церьков Божу. Но з благодати Божой я тым, чім єм, а його благодать не была у мі даремна. Веце я ся наробив як они вшыткы, но не я, то благодать Божа, котру мам в собі. Прото ці я, або они — так проповідаме, а вы так увірили.

Апостол на неділі і свята в русиньскым языку выдало Общество св. Йоана Крестителя. Коректы до тлумачыня вводил екзарх пражского екзархату для грекокатоликів в Чешскій Республиці преосвященый владыка Іван Лавинець.
Апостол на неділі і свята мат імпріматур грекокатолицкого пряшівского єпархы, преосвященого владыкы Йоана Гіркы.

Апостол в русиньскым языку высыламе в неділю о 09.17 год., повторіня в неділю о 12.17 год. і в понедільок о 02.17 год.