Ансамбль Рутенія одсвяткує ювілей 10. річниці свого істнуваня

Ансамбль Рутенія з Братиславы празднує ювілей 10. річниці основаня колективу. З той нагоды ансамбль зрыхтувал новый танцювально-драматичный спектакль.

Представліня пн. «Хырбетом ку горам» поведе публику через важны подіі першой половины ХХ ст., котры мали основне влияня на долю Русинів. Премєра спектаклю зо святкуваньом ювілею одбуде ся в суботу, 4. червця/юнія, в Домі Культуры Zrkadlový háj в Братиславі.

Святочна ґаля

Торжественна подія пройде при присутности гости з культурного і соспільного жытя на Словациі, представників русиньскых орґанізаций зо Словациі і інчых держав та членів Світовой Рады Русинів. Покровительство над подійом обняла президентка Словацкой Республикы Зузана Чапутова.

Проґрам «Хырбетом ку горам» буде четвертом премєром в діяльности ансамблю Рутенія. «Є то представліня о горах і людях, што до них належат. О горах твердых і ласкавых, так само як люде, для котрых Карпаты все были колыском, з котрой од віків походили і з котрой выводят ся новы поколіня Карпатскых Русинів» – бесідує Петро Медвідь, автор сценария спектаклю і його режысер.

Наголовок спектаклю навязує до наголовка словацкого перекладу книжкы Павла Р. Маґочія «Хырбетом ку горам. Істория Карпатской Руси і Карпатскых Русинів». Проф. Маґочій комплексово описал в ній долю Русинів од найдавнійшых часів по сучасніст. Автор моноґрафіі не лем дозволил перевзяти наголовок представліня, але і особисто буде присутный на премєрі.

Важне ХХ столітя

Доля вельох Русинів і русиньскых родин, котры перед І світовом войном жыли на обшыри Австро-Угорской Імпериі, назначена была переломныма подіями ХХ ст., як примірово масова еміґрация за океан ци обі світовы войны з наслідством ґеополітичных змін.

«Подіі першой половины ХХ ст. были особливо важны для Русинів, зато тіж і на них сме ся зосередили в танцювально-драматичным спектакли Хырбетом ку горам. Публику през ціле представліня вела буде особа Миколая Бескіда, вызначной русиньской личности» – оповідат Петро Штефаняк, кєрівник ансамблю Рутенія.

Миколай Бескід походит з важной русиньской родины Бескідів, серед котрoй находило ся пару будителів народа. «Миколай єст втілесіньом путуваня нашого народу в ХХ ст. Был грекокатолицкым священником, патріотом, діячом і будительом, а при тым скромным чловеком, котрый ціле своє жытя посвятил духовій службі вірным і свому народови» – додає сценариста і режысер Петро Медвідь.

10-літя ансамблю

Попри драматичній верстві представліня ансамбль Рутенія запрезентує танцювальны і музичны формы з русиньскых части пілнічно-східньой Словациі та Підкарпатской Руси, де од віків прожывают Русины.

По головным представліню пройде премєровый выступ дітячого ансамблю Рутенячык, котрый свою діяльніст зачал лем в вересни/септембрі минулого рока. «Маме свідоміст, як важне є передавати наше знаня молодшій ґенерациі, зато рішыли сме сотворити при ансамбли Рутенія дітячу ґрупу» – додає основатель і ведучый ансамблю Рутенія Петро Штефаняк.

Дальша част святкуваня буде проходила при звуках Народного Ансамблю Андрея Загорца, котрый был першом капельом пригрываючом Рутеніі.

Вступне на представліня можете придбати через порталь rezervovane.sk.